Abhirūpanandātherīgāthā

19 "Āturaṃ asuciṃ pūtiṃ,
passa nande samussayaṃ;
Asubhāya cittaṃ bhāvehi,
ekaggaṃ susamāhitaṃ.

20 Animittañca bhāvehi,
mānānusayamujjaha;
Tato mānābhisamayā,
upasantā carissasī"ti.

Jentātherīgāthā

21 "Ye ime satta bojjhangā,
maggā nibbānapattiyā;
Bhāvitā te mayā sabbe,
yathā buddhena desitā.

22 Diṭṭho hi me so bhagavā,
antimoyaṃ samussayo;
Vikkhīṇo jātisaṃsāro,
natthi dāni punabbhavo"ti.

Sumangalamātātherīgāthā

23 "Sumuttikā sumuttikā,
Sādhumuttikāmhi musalassa;
Ahiriko me chattakaṃ vāpi,
Ukkhalikā me deḍḍubhaṃ vāti.

24 Rāgañca ahaṃ dosañca,
Cicciṭi cicciṭīti vihanāmi;
Sā rukkhamūlamupagamma,
Aho sukhanti sukhato jhāyāmī"ti.

Aḍḍhakāsitherīgāthā

25 "Yāva kāsijanapado,
sunko me tatthako ahu;
Taṃ katvā negamo agghaṃ,
aḍḍhenagghaṃ ṭhapesi maṃ.

26 Atha nibbindahaṃ rūpe,
nibbindañca virajjahaṃ;
Mā puna jātisaṃsāraṃ,
sandhāveyyaṃ punappunaṃ;
Tisso vijjā sacchikatā,
kataṃ buddhassa sāsanan"ti.

Cittātherīgāthā

27 "Kiñcāpi khomhi kisikā,
gilānā bāḷhadubbalā;
Daṇḍamolubbha gacchāmi,
pabbataṃ abhirūhiya.

28 Sanghāṭiṃ nikkhipitvāna,
pattakañca nikujjiya;
Sele khambhesimattānaṃ,
tamokhandhaṃ padāliyā"ti.

Mettikātherīgāthā

29 "Kiñcāpi khomhi dukkhitā,
dubbalā gatayobbanā;
Daṇḍamolubbha gacchāmi,
pabbataṃ abhirūhiya.

30 Nikkhipitvāna sanghāṭiṃ,
pattakañca nikujjiya;
Nisinnā camhi selamhi,
atha cittaṃ vimucci me;
Tisso vijjā anuppattā,
kataṃ buddhassa sāsanan"ti.

Mittātherīgāthā

31 "Cātuddasiṃ pañcadasiṃ,
yā ca pakkhassa aṭṭhamī;
Pāṭihāriyapakkhañca,
aṭṭhangasusamāgataṃ.

32 Uposathaṃ upāgacchiṃ,
devakāyābhinandinī;
Sājja ekena bhattena,
muṇḍā sanghāṭipārutā;
Devakāyaṃ na patthehaṃ,
vineyya hadaye daran"ti.

Abhayamātutherīgāthā

33 "Uddhaṃ pādatalā amma,
adho ve kesamatthakā;
Paccavekkhassumaṃ kāyaṃ,
asuciṃ pūtigandhikaṃ.

34 Evaṃ viharamānāya,
sabbo rāgo samūhato;
Pariḷāho samucchinno,
sītibhūtāmhi nibbutā"ti.

Abhayātherīgāthā

35 "Abhaye bhiduro kāyo,
yattha satā puthujjanā;
Nikkhipissāmimaṃ dehaṃ,
sampajānā satīmatī.

36 Bahūhi dukkhadhammehi,
appamādaratāya me;
Taṇhakkhayo anuppatto,
kataṃ buddhassa sāsanan"ti.

Sāmātherīgāthā

37 "Catukkhattuṃ pañcakkhattuṃ,
vihārā upanikkhamiṃ;
Aladdhā cetaso santiṃ,
citte avasavattinī;
Tassā me aṭṭhamī ratti,
yato taṇhā samūhatā.

38 Bahūhi dukkhadhammehi,
appamādaratāya me;
Taṇhakkhayo anuppatto,
kataṃ buddhassa sāsanan"ti.