Aparāsāmātherīgāthā

39 "Paṇṇavīsativassāni,
yato pabbajitāya me;
Nābhijānāmi cittassa,
samaṃ laddhaṃ kudācanaṃ.

40 Aladdhā cetaso santiṃ,
citte avasavattinī;
Tato saṃvegamāpādiṃ,
saritvā jinasāsanaṃ.

41 Bahūhi dukkhadhammehi,
appamādaratāya me;
Taṇhakkhayo anuppatto,
kataṃ buddhassa sāsanaṃ;
Ajja me sattamī ratti,
yato taṇhā visositā"ti.

Uttamātherīgāthā

42 "Catukkhattuṃ pañcakkhattuṃ,
vihārā upanikkhamiṃ;
Aladdhā cetaso santiṃ,
citte avasavattinī.

43 Sā bhikkhuniṃ upagacchiṃ,
yā me saddhāyikā ahu;
Sā me dhammamadesesi,
khandhāyatanadhātuyo.

44 Tassā dhammaṃ suṇitvāna,
Yathā maṃ anusāsi sā;
Sattāhaṃ ekapallankena,
Nisīdiṃ pītisukhasamappitā;
Aṭṭhamiyā pāde pasāresiṃ,
Tamokhandhaṃ padāliyā"ti.

Aparāuttamātherīgāthā

45 "Ye ime satta bojjhangā,
maggā nibbānapattiyā;
Bhāvitā te mayā sabbe,
yathā buddhena desitā.

46 Suññatassānimittassa,
lābhinīhaṃ yadicchakaṃ;
Orasā dhītā buddhassa,
nibbānābhiratā sadā.

47 Sabbe kāmā samucchinnā,
ye dibbā ye ca mānusā;
Vikkhīṇo jātisaṃsāro,
natthi dāni punabbhavo"ti.

Dantikātherīgāthā

48 "Divāvihārā nikkhamma,
gijjhakūṭamhi pabbate;
Nāgaṃ ogāhamuttiṇṇaṃ,
nadītīramhi addasaṃ.

49 Puriso ankusamādāya,
‘dehi pādan’ti yācati;
Nāgo pasārayī pādaṃ,
puriso nāgamāruhi.

50 Disvā adantaṃ damitaṃ,
manussānaṃ vasaṃ gataṃ;
Tato cittaṃ samādhesiṃ,
khalu tāya vanaṃ gatā"ti.

Ubbiritherīgāthā

51 "Amma jīvāti vanamhi kandasi,
Attānaṃ adhigaccha ubbiri;
Cullāsītisahassāni,
Sabbā jīvasanāmikā;
Etamhāḷāhane daḍḍhā,
Tāsaṃ kamanusocasi".

52 "Abbahī vata me sallaṃ,
duddasaṃ hadayassitaṃ;
Yaṃ me sokaparetāya,
dhītusokaṃ byapānudi.

53 Sājja abbūḷhasallāhaṃ,
Nicchātā parinibbutā;
Buddhaṃ dhammañca saṃghañca,
Upemi saraṇaṃ munin"ti.

Sukkātherīgāthā

54 "Kiṃme katā rājagahe manussā,
Madhuṃ pītāva acchare;
Ye sukkaṃ na upāsanti,
Desentiṃ buddhasāsanaṃ.

55 Tañca appaṭivānīyaṃ,
asecanakamojavaṃ;
Pivanti maññe sappaññā,
valāhakamivaddhagū.

56 Sukkā sukkehi dhammehi,
vītarāgā samāhitā;
Dhāreti antimaṃ dehaṃ,
jetvā māraṃ savāhinin"ti.

Selātherīgāthā

57 "Natthi nissaraṇaṃ loke,
kiṃ vivekena kāhasi;
Bhuñjāhi kāmaratiyo,
māhu pacchānutāpinī".

58 "Sattisūlūpamā kāmā,
khandhāsaṃ adhikuṭṭanā;
Yaṃ tvaṃ ‘kāmaratiṃ’ brūsi,
‘aratī’ dāni sā mama.

59 Sabbattha vihatā nandī,
Tamokhandho padālito;
Evaṃ jānāhi pāpima,
Nihato tvamasi antakā"ti.

Somātherīgāthā

60 "Yaṃ taṃ isīhi pattabbaṃ,
ṭhānaṃ durabhisambhavaṃ;
Na taṃ dvangulapaññāya,
sakkā pappotumitthiyā".

61 "Itthibhāvo no kiṃ kayirā,
cittamhi susamāhite;
Ñāṇamhi vattamānamhi,
sammā dhammaṃ vipassato.

62 Sabbattha vihatā nandī,
Tamokhandho padālito;
Evaṃ jānāhi pāpima,
Nihato tvamasi antakā"ti.