Aññatarātherīgāthā

1 "Sukhaṃ supāhi therike,
Katvā coḷena pārutā;
Upasanto hi te rāgo,
Sukkhaḍākaṃ va kumbhiyan"ti.

Muttātherīgāthā

2 "Mutte muccassu yogehi,
cando rāhuggahā iva;
Vippamuttena cittena,
anaṇā bhuñja piṇḍakan"ti.

Puṇṇātherīgāthā

3 "Puṇṇe pūrassu dhammehi,
Cando pannaraseriva;
Paripuṇṇāya paññāya,
Tamokhandhaṃ padālayā"ti.

Tissātherīgāthā

4 "Tisse sikkhassu sikkhāya,
mā taṃ yogā upaccaguṃ;
Sabbayogavisaṃyuttā,
cara loke anāsavā"ti.

Aññatarātissātherīgāthā

5 "Tisse yuñjassu dhammehi,
khaṇo taṃ mā upaccagā;
Khaṇātītā hi socanti,
nirayamhi samappitā"ti.

Dhīrātherīgāthā

6 "Dhīre nirodhaṃ phusehi,
Saññāvūpasamaṃ sukhaṃ;
Ārādhayāhi nibbānaṃ,
Yogakkhemamanuttaran"ti.

Vīrātherīgāthā

7 "Vīrā vīrehi dhammehi,
bhikkhunī bhāvitindriyā;
Dhāreti antimaṃ dehaṃ,
jetvā māraṃ savāhinin"ti.

Mittātherīgāthā

8 "Saddhāya pabbajitvāna,
mitte mittaratā bhava;
Bhāvehi kusale dhamme,
yogakkhemassa pattiyā"ti.

Bhadrātherīgāthā

9 "Saddhāya pabbajitvāna,
bhadre bhadraratā bhava;
Bhāvehi kusale dhamme,
yogakkhemamanuttaran"ti.

Upasamātherīgāthā

10 "Upasame tare oghaṃ,
maccudheyyaṃ suduttaraṃ;
Dhārehi antimaṃ dehaṃ,
jetvā māraṃ savāhinin"ti.

Muttātherīgāthā

11 "Sumuttā sādhumuttāmhi,
tīhi khujjehi muttiyā;
Udukkhalena musalena,
patinā khujjakena ca;
Muttāmhi jātimaraṇā,
bhavanetti samūhatā"ti.

Dhammadinnātherīgāthā

12 "Chandajātā avasāyī,
Manasā ca phuṭā siyā;
Kāmesu appaṭibaddhacittā,
Uddhaṃsotāti vuccatī"ti.

Visākhātherīgāthā

13 "Karotha buddhasāsanaṃ,
yaṃ katvā nānutappati;
Khippaṃ pādāni dhovitvā,
ekamante nisīdathā"ti.

Sumanātherīgāthā

14 "Dhātuyo dukkhato disvā,
mā jātiṃ punarāgami;
Bhave chandaṃ virājetvā,
upasantā carissasī"ti.

Uttarātherīgāthā

15 "Kāyena saṃvutā āsiṃ,
vācāya uda cetasā;
Samūlaṃ taṇhamabbuyha,
sītibhūtāmhi nibbutā"ti.

Vuḍḍhapabbajitasumanātherīgāthā

16 "Sukhaṃ tvaṃ vuḍḍhike sehi,
katvā coḷena pārutā;
Upasanto hi te rāgo,
sītibhūtāsi nibbutā"ti.

Dhammātherīgāthā

17 "Piṇḍapātaṃ caritvāna,
daṇḍamolubbha dubbalā;
Vedhamānehi gattehi,
tattheva nipatiṃ chamā;
Disvā ādīnavaṃ kāye,
atha cittaṃ vimucci me"ti.

Saṇghātherīgāthā

18 "Hitvā ghare pabbajitvā,
hitvā puttaṃ pasuṃ piyaṃ;
Hitvā rāgañca dosañca,
avijjañca virājiya;
Samūlaṃ taṇhamabbuyha,
upasantāmhi nibbutā"ti.