1 Sāvatthinidānaṃ. Atha kho cālā bhikkhunī pubbaṇhasamayaṃ nivāsetvā … pe … aññatarasmiṃ rukkhamūle divāvihāraṃ nisīdi. Atha kho māro pāpimā yena cālā bhikkhunī tenupasankami; upasankamitvā cālaṃ bhikkhuniṃ etadavoca:  "kiṃ nu tvaṃ, bhikkhuni, na rocesī"ti? "Jātiṃ khvāhaṃ, āvuso, na rocemī"ti.

2 "Kiṃ nu jātiṃ na rocesi,
jāto kāmāni bhuñjati;
Ko nu taṃ idamādapayi,
jātiṃ mā roca bhikkhunī"ti.

3 "Jātassa maraṇaṃ hoti,
jāto dukkhāni phussati;
Bandhaṃ vadhaṃ pariklesaṃ,
tasmā jātiṃ na rocaye.

4 Buddho dhammamadesesi,
jātiyā samatikkamaṃ;
Sabbadukkhappahānāya,
so maṃ sacce nivesayi.

5 Ye ca rūpūpagā sattā,
ye ca arūpaṭṭhāyino;
Nirodhaṃ appajānantā,
āgantāro punabbhavan"ti.

6 Atha kho māro pāpimā "jānāti maṃ cālā bhikkhunī"ti dukkhī dummano tatthevantaradhāyīti.