Subhājīvakambavanikātherīgāthā

368 Jīvakambavanaṃ rammaṃ,
Gacchantiṃ bhikkhuniṃ subhaṃ;
Dhuttako sannivāresi,
Tamenaṃ abravī subhā.

369 "Kiṃ te aparādhitaṃ mayā,
Yaṃ maṃ ovariyāna tiṭṭhasi;
Na hi pabbajitāya āvuso,
Puriso samphusanāya kappati.

370 Garuke mama satthusāsane,
Yā sikkhā sugatena desitā;
Parisuddhapadaṃ anangaṇaṃ,
Kiṃ maṃ ovariyāna tiṭṭhasi.

371 Āvilacitto anāvilaṃ,
Sarajo vītarajaṃ anangaṇaṃ;
Sabbattha vimuttamānasaṃ,
Kiṃ maṃ ovariyāna tiṭṭhasi".

372 "Daharā ca apāpikā casi,
Kiṃ te pabbajjā karissati;
Nikkhipa kāsāyacīvaraṃ,
Ehi ramāma supupphite vane.

373 Madhurañca pavanti sabbaso,
Kusumarajena samuṭṭhitā dumā;
Paṭhamavasanto sukho utu,
Ehi ramāma supupphite vane.

374 Kusumitasikharā ca pādapā,
Abhigajjantiva māluteritā;
Kā tuyhaṃ rati bhavissati,
Yadi ekā vanamogahissasi.

375 Vāḷamigasanghasevitaṃ,
Kuñjaramattakareṇuloḷitaṃ;
Asahāyikā gantumicchasi,
Rahitaṃ bhiṃsanakaṃ mahāvanaṃ.

376 Tapanīyakatāva dhītikā,
Vicarasi cittalateva accharā;
Kāsikasukhumehi vaggubhi,
Sobhasī suvasanehi nūpame.

377 Ahaṃ tava vasānugo siyaṃ,
Yadi viharemase kānanantare;
Na hi matthi tayā piyattaro,
Pāṇo kinnarimandalocane.

378 Yadi me vacanaṃ karissasi,
Sukhitā ehi agāramāvasa;
Pāsādanivātavāsinī,
Parikammaṃ te karontu nāriyo.

379 Kāsikasukhumāni dhāraya,
Abhiropehi ca mālavaṇṇakaṃ;
Kañcanamaṇimuttakaṃ bahuṃ,
Vividhaṃ ābharaṇaṃ karomi te.

380 Sudhotarajapacchadaṃ subhaṃ,
Gonakatūlikasanthataṃ navaṃ;
Abhiruha sayanaṃ mahārahaṃ,
Candanamaṇḍitasāragandhikaṃ.

381 Uppalaṃ cudakā samuggataṃ,
Yathā taṃ amanussasevitaṃ;
Evaṃ tvaṃ brahmacārinī,
Sakesangesu jaraṃ gamissasi".

382 "Kiṃ te idha sārasammataṃ,
Kuṇapapūramhi susānavaḍḍhane;
Bhedanadhamme kaḷevare,
Yaṃ disvā vimano udikkhasi".

383 "Akkhīni ca tūriyāriva,
Kinnariyāriva pabbatantare;
Tava me nayanāni dakkhiya,
Bhiyyo kāmaratī pavaḍḍhati.

384 Uppalasikharopamāni te,
Vimale hāṭakasannibhe mukhe;
Tava me nayanāni dakkhiya,
Bhiyyo kāmaguṇo pavaḍḍhati.

385 Api dūragatā saramhase,
Āyatapamhe visuddhadassane;
Na hi matthi tayā piyattaro,
Nayanā kinnarimandalocane".

386 "Apathena payātumicchasi,
Candaṃ kīḷanakaṃ gavesasi;
Meruṃ langhetumicchasi,
Yo tvaṃ buddhasutaṃ maggayasi.

387 Natthi hi loke sadevake,
Rāgo yatthapi dāni me siyā;
Napi naṃ jānāmi kīriso,
Atha maggena hato samūlako.

388 Ingālakuyāva ujjhito,
Visapattoriva aggito kato;
Napi naṃ passāmi kīriso,
Atha maggena hato samūlako.

389 Yassā siyā apaccavekkhitaṃ,
Satthā vā anupāsito siyā;
Tvaṃ tādisikaṃ palobhaya,
Jānantiṃ so imaṃ vihaññasi.

390 Mayhañhi akkuṭṭhavandite,
Sukhadukkhe ca satī upaṭṭhitā;
Sankhatamasubhanti jāniya,
Sabbattheva mano na limpati.

391 Sāhaṃ sugatassa sāvikā,
Maggaṭṭhangikayānayāyinī;
Uddhaṭasallā anāsavā,
Suññāgāragatā ramāmahaṃ.

392 Diṭṭhā hi mayā sucittitā,
Sombhā dārukapillakāni vā;
Tantīhi ca khīlakehi ca,
Vinibaddhā vividhaṃ panaccakā.

393 Tamhuddhaṭe tantikhīlake,
Vissaṭṭhe vikale parikrite;
Na vindeyya khaṇḍaso kate,
Kimhi tattha manaṃ nivesaye.

394 Tathūpamā dehakāni maṃ,
Tehi dhammehi vinā na vattanti;
Dhammehi vinā na vattati,
Kimhi tattha manaṃ nivesaye.

395 Yathā haritālena makkhitaṃ,
Addasa cittikaṃ bhittiyā kataṃ;
Tamhi te viparītadassanaṃ,
Saññā mānusikā niratthikā.

396 Māyaṃ viya aggato kataṃ,
Supinanteva suvaṇṇapādapaṃ;
Upagacchasi andha rittakaṃ,
Janamajjheriva rupparūpakaṃ.

397 Vaṭṭaniriva koṭarohitā,
Majjhe pubbuḷakā saassukā;
Pīḷakoḷikā cettha jāyati,
Vividhā cakkhuvidhā ca piṇḍitā".

398 Uppāṭiya cārudassanā,
Na ca pajjittha asangamānasā;
"Handa te cakkhuṃ harassu taṃ",
Tassa narassa adāsi tāvade.

399 Tassa ca viramāsi tāvade,
Rāgo tattha khamāpayī ca naṃ;
"Sotthi siyā brahmacārinī,
Na puno edisakaṃ bhavissati".

400 "Āsādiya edisaṃ janaṃ,
Aggiṃ pajjalitaṃva lingiya;
Gaṇhiya āsīvisaṃ viya,
Api nu sotthi siyā khamehi no".

401 Muttā ca tato sā bhikkhunī,
Agamī buddhavarassa santikaṃ;
Passiya varapuññalakkhaṇaṃ,
Cakkhu āsi yathā purāṇakanti.