Ambapālītherīgāthā

252 "Kāḷakā bhamaravaṇṇasādisā,
Vellitaggā mama muddhajā ahuṃ;
Te jarāya sāṇavākasādisā,
Saccavādivacanaṃ anaññathā.

253 Vāsitova surabhī karaṇḍako,
Pupphapūra mama uttamangajo;
Taṃ jarāyatha salomagandhikaṃ,
Saccavādivacanaṃ anaññathā.

254 Kānanaṃva sahitaṃ suropitaṃ,
Kocchasūcivicitaggasobhitaṃ;
Taṃ jarāya viralaṃ tahiṃ tahiṃ,
Saccavādivacanaṃ anaññathā.

255 Kaṇhakhandhakasuvaṇṇamaṇḍitaṃ,
Sobhate suveṇīhilankataṃ;
Taṃ jarāya khalitaṃ siraṃ kataṃ,
Saccavādivacanaṃ anaññathā.

256 Cittakārasukatāva lekhikā,
Sobhare su bhamukā pure mama;
Tā jarāya valibhippalambitā,
Saccavādivacanaṃ anaññathā.

257 Bhassarā surucirā yathā maṇī,
Nettahesumabhinīlamāyatā;
Te jarāyabhihatā na sobhare,
Saccavādivacanaṃ anaññathā.

258 Saṇhatungasadisī ca nāsikā,
Sobhate su abhiyobbanaṃ pati;
Sā jarāya upakūlitā viya,
Saccavādivacanaṃ anaññathā.

259 Kankaṇaṃva sukataṃ suniṭṭhitaṃ,
Sobhare su mama kaṇṇapāḷiyo;
Tā jarāya valibhippalambitā,
Saccavādivacanaṃ anaññathā.

260 Pattalīmakulavaṇṇasādisā,
Sobhare su dantā pure mama;
Te jarāya khaṇḍitā cāsitā,
Saccavādivacanaṃ anaññathā.

261 Kānanamhi vanasaṇḍacārinī,
Kokilāva madhuraṃ nikūjihaṃ;
Taṃ jarāya khalitaṃ tahiṃ tahiṃ,
Saccavādivacanaṃ anaññathā.

262 Saṇhakamburiva suppamajjitā,
Sobhate su gīvā pure mama;
Sā jarāya bhaggā vināmitā,
Saccavādivacanaṃ anaññathā.

263 Vaṭṭapalighasadisopamā ubho,
Sobhare su bāhā pure mama;
Tā jarāya yatha pāṭalibbalitā,
Saccavādivacanaṃ anaññathā.

264 Saṇhamuddikasuvaṇṇamaṇḍitā,
Sobhare su hatthā pure mama;
Te jarāya yathā mūlamūlikā,
Saccavādivacanaṃ anaññathā.

265 Pīnavaṭṭasahituggatā ubho,
Sobhare su thanakā pure mama;
Thevikīva lambanti nodakā,
Saccavādivacanaṃ anaññathā.

266 Kañcanassa phalakaṃva sammaṭṭhaṃ,
Sobhate su kāyo pure mama;
So valīhi sukhumāhi otato,
Saccavādivacanaṃ anaññathā.

267 Nāgabhogasadisopamā ubho,
Sobhare su ūrū pure mama;
Te jarāya yathā veḷunāḷiyo,
Saccavādivacanaṃ anaññathā.

268 Saṇhanūpurasuvaṇṇamaṇḍitā,
Sobhare su janghā pure mama;
Tā jarāya tiladaṇḍakāriva,
Saccavādivacanaṃ anaññathā.

269 Tūlapuṇṇasadisopamā ubho,
Sobhare su pādā pure mama;
Te jarāya phuṭitā valīmatā,
Saccavādivacanaṃ anaññathā.

270 Ediso ahu ayaṃ samussayo,
Jajjaro bahudukkhānamālayo;
Sopalepapatito jarāgharo,
Saccavādivacanaṃ anaññathā".

Rohinītherīgāthā

271 "‘Samaṇā’ti bhoti supi,
‘samaṇā’ti pabujjhasi;
Samaṇāneva kittesi,
samaṇī nūna bhavissasi.

272 Vipulaṃ annañca pānañca,
samaṇānaṃ paveccasi;
Rohinī dāni pucchāmi,
kena te samaṇā piyā.

273 Akammakāmā alasā,
paradattūpajīvino;
Āsaṃsukā sādukāmā,
kena te samaṇā piyā".

274 "Cirassaṃ vata maṃ tāta,
samaṇānaṃ paripucchasi;
Tesaṃ te kittayissāmi,
paññāsīlaparakkamaṃ.

275 Kammakāmā analasā,
kammaseṭṭhassa kārakā;
Rāgaṃ dosaṃ pajahanti,
tena me samaṇā piyā.

276 Tīṇi pāpassa mūlāni,
dhunanti sucikārino;
Sabbaṃ pāpaṃ pahīnesaṃ,
tena me samaṇā piyā.

277 Kāyakammaṃ suci nesaṃ,
vacīkammañca tādisaṃ;
Manokammaṃ suci nesaṃ,
tena me samaṇā piyā.

278 Vimalā sankhamuttāva,
suddhā santarabāhirā;
Puṇṇā sukkāna dhammānaṃ,
tena me samaṇā piyā.

279 Bahussutā dhammadharā,
ariyā dhammajīvino;
Atthaṃ dhammañca desenti,
tena me samaṇā piyā.

280 Bahussutā dhammadharā,
ariyā dhammajīvino;
Ekaggacittā satimanto,
tena me samaṇā piyā.

281 Dūrangamā satimanto,
mantabhāṇī anuddhatā;
Dukkhassantaṃ pajānanti,
tena me samaṇā piyā.

282 Yasmā gāmā pakkamanti,
na vilokenti kiñcanaṃ;
Anapekkhāva gacchanti,
tena me samaṇā piyā.

283 Na te saṃ koṭṭhe openti,
na kumbhiṃ na khaḷopiyaṃ;
Pariniṭṭhitamesānā,
tena me samaṇā piyā.

284 Na te hiraññaṃ gaṇhanti,
na suvaṇṇaṃ na rūpiyaṃ;
Paccuppannena yāpenti,
tena me samaṇā piyā.

285 Nānākulā pabbajitā,
nānājanapadehi ca;
Aññamaññaṃ piyāyanti,
tena me samaṇā piyā".

286 "Atthāya vata no bhoti,
kule jātāsi rohinī;
Saddhā buddhe ca dhamme ca,
saṃghe ca tibbagāravā.

287 Tuvaṃ hetaṃ pajānāsi,
puññakkhettaṃ anuttaraṃ;
Amhampi ete samaṇā,
paṭigaṇhanti dakkhiṇaṃ.

288 Patiṭṭhito hettha yañño,
vipulo no bhavissati";
"Sace bhāyasi dukkhassa,
sace te dukkhamappiyaṃ.

289 Upehi saraṇaṃ buddhaṃ,
dhammaṃ saṃghañca tādinaṃ;
Samādiyāhi sīlāni,
taṃ te atthāya hehiti".

290 "Upemi saraṇaṃ buddhaṃ,
dhammaṃ saṃghañca tādinaṃ;
Samādiyāmi sīlāni,
taṃ me atthāya hehiti.

291 Brahmabandhu pure āsiṃ,
so idānimhi brāhmaṇo;
Tevijjo sottiyo camhi,
vedagū camhi nhātako".

Cāpātherīgāthā

292 "Laṭṭhihattho pure āsi,
so dāni migaluddako;
Āsāya palipā ghorā,
nāsakkhi pārametave.

293 Sumattaṃ maṃ maññamānā,
cāpā puttamatosayi;
Cāpāya bandhanaṃ chetvā,
pabbajissaṃ punopahaṃ".

294 "Mā me kujjhi mahāvīra,
mā me kujjhi mahāmuni;
Na hi kodhaparetassa,
suddhi atthi kuto tapo".

295 "Pakkamissañca nāḷāto,
kodha nāḷāya vacchati;
Bandhantī itthirūpena,
samaṇe dhammajīvino".

296 "Ehi kāḷa nivattassu,
bhuñja kāme yathā pure;
Ahañca te vasīkatā,
ye ca me santi ñātakā".

297 "Etto cāpe catubbhāgaṃ,
yathā bhāsasi tvañca me;
Tayi rattassa posassa,
uḷāraṃ vata taṃ siyā".

298 "Kāḷanginiṃva takkāriṃ,
pupphitaṃ girimuddhani;
Phullaṃ dālimalaṭṭhiṃva,
antodīpeva pāṭaliṃ.

299 Haricandanalittangiṃ,
kāsikuttamadhāriniṃ;
Taṃ maṃ rūpavatiṃ santiṃ,
kassa ohāya gacchasi".

300 "Sākuntikova sakuṇiṃ,
yathā bandhitumicchati;
Āharimena rūpena,
na maṃ tvaṃ bādhayissasi".

301 "Imañca me puttaphalaṃ,
kāḷa uppāditaṃ tayā;
Taṃ maṃ puttavatiṃ santiṃ,
kassa ohāya gacchasi".

302 "Jahanti putte sappaññā,
tato ñātī tato dhanaṃ;
Pabbajanti mahāvīrā,
nāgo chetvāva bandhanaṃ".

303 "Idāni te imaṃ puttaṃ,
Daṇḍena churikāya vā;
Bhūmiyaṃ vā nisumbhissaṃ,
Puttasokā na gacchasi".

304 "Sace puttaṃ singālānaṃ,
kukkurānaṃ padāhisi;
Na maṃ puttakatte jammi,
punarāvattayissasi".

305 "Handa kho dāni bhaddante,
kuhiṃ kāḷa gamissasi;
Katamaṃ gāmanigamaṃ,
nagaraṃ rājadhāniyo".

306 "Ahumha pubbe gaṇino,
Assamaṇā samaṇamānino;
Gāmena gāmaṃ vicarimha,
Nagare rājadhāniyo.

307 Eso hi bhagavā buddho,
nadiṃ nerañjaraṃ pati;
Sabbadukkhappahānāya,
dhammaṃ deseti pāṇinaṃ;
Tassāhaṃ santikaṃ gacchaṃ,
so me satthā bhavissati".

308 "Vandanaṃ dāni vajjāsi,
lokanāthaṃ anuttaraṃ;
Padakkhiṇañca katvāna,
ādiseyyāsi dakkhiṇaṃ".

309 "Etaṃ kho labbhamamhehi,
yathā bhāsasi tvañca me;
Vandanaṃ dāni te vajjaṃ,
lokanāthaṃ anuttaraṃ;
Padakkhiṇañca katvāna,
ādisissāmi dakkhiṇaṃ".

310 Tato ca kāḷo pakkāmi,
nadiṃ nerañjaraṃ pati;
So addasāsi sambuddhaṃ,
desentaṃ amataṃ padaṃ.

311 Dukkhaṃ dukkhasamuppādaṃ,
dukkhassa ca atikkamaṃ;
Ariyaṃ caṭṭhangikaṃ maggaṃ,
dukkhūpasamagāminaṃ.

312 Tassa pādāni vanditvā,
Katvāna naṃ padakkhiṇaṃ;
Cāpāya ādisitvāna,
Pabbajiṃ anagāriyaṃ;
Tisso vijjā anuppattā,
Kataṃ buddhassa sāsanaṃ.

Sundarītherīgāthā

313 "Petāni bhoti puttāni,
khādamānā tuvaṃ pure;
Tuvaṃ divā ca ratto ca,
atīva paritappasi.

314 Sājja sabbāni khāditvā,
sataputtāni brāhmaṇī;
Vāseṭṭhi kena vaṇṇena,
na bāḷhaṃ paritappasi".

315 "Bahūni puttasatāni,
ñātisanghasatāni ca;
Khāditāni atītaṃse,
mama tuyhañca brāhmaṇa.

316 Sāhaṃ nissaraṇaṃ ñatvā,
jātiyā maraṇassa ca;
Na socāmi na rodāmi,
na cāpi paritappayiṃ".

317 "Abbhutaṃ vata vāseṭṭhi,
vācaṃ bhāsasi edisiṃ;
Kassa tvaṃ dhammamaññāya,
giraṃ bhāsasi edisiṃ".

318 "Esa brāhmaṇa sambuddho,
nagaraṃ mithilaṃ pati;
Sabbadukkhappahānāya,
dhammaṃ desesi pāṇinaṃ.

319 Tassa brahme arahato,
dhammaṃ sutvā nirūpadhiṃ;
Tattha viññātasaddhammā,
puttasokaṃ byapānudiṃ".

320 "So ahampi gamissāmi,
nagaraṃ mithilaṃ pati;
Appeva maṃ so bhagavā,
sabbadukkhā pamocaye".

321 Addasa brāhmaṇo buddhaṃ,
vippamuttaṃ nirūpadhiṃ;
Svassa dhammamadesesi,
muni dukkhassa pāragū.

322 Dukkhaṃ dukkhasamuppādaṃ,
dukkhassa ca atikkamaṃ;
Ariyaṃ caṭṭhangikaṃ maggaṃ,
dukkhūpasamagāminaṃ.

323 Tattha viññātasaddhammo,
pabbajjaṃ samarocayi;
Sujāto tīhi rattīhi,
tisso vijjā aphassayi.

324 "Ehi sārathi gacchāhi,
rathaṃ niyyādayāhimaṃ;
Ārogyaṃ brāhmaṇiṃ vajja,
‘pabbaji dāni brāhmaṇo;
Sujāto tīhi rattīhi,
tisso vijjā aphassayi’".

325 Tato ca rathamādāya,
sahassañcāpi sārathi;
Ārogyaṃ brāhmaṇiṃvoca,
"pabbaji dāni brāhmaṇo;
Sujāto tīhi rattīhi,
tisso vijjā aphassayi".

326 "Etañcāhaṃ assarathaṃ,
sahassañcāpi sārathi;
Tevijjaṃ brāhmaṇaṃ sutvā,
puṇṇapattaṃ dadāmi te".

327 "Tuyheva hotvassaratho,
sahassañcāpi brāhmaṇi;
Ahampi pabbajissāmi,
varapaññassa santike".

328 "Hatthī gavassaṃ maṇikuṇḍalañca,
Phītañcimaṃ gahavibhavaṃ pahāya;
Pitā pabbajito tuyhaṃ,
Bhuñja bhogāni sundarī;
Tuvaṃ dāyādikā kule".

329 "Hatthī gavassaṃ maṇikuṇḍalañca,
Rammaṃ cimaṃ gahavibhavaṃ pahāya;
Pitā pabbajito mayhaṃ,
Puttasokena aṭṭito;
Ahampi pabbajissāmi,
Bhātusokena aṭṭitā".

330 "So te ijjhatu sankappo,
yaṃ tvaṃ patthesi sundarī;
Uttiṭṭhapiṇḍo uñcho ca,
paṃsukūlañca cīvaraṃ;
Etāni abhisambhontī,
paraloke anāsavā".

331 "Sikkhamānāya me ayye,
dibbacakkhu visodhitaṃ;
Pubbenivāsaṃ jānāmi,
yattha me vusitaṃ pure.

332 Tuvaṃ nissāya kalyāṇi,
theri saṃghassa sobhane;
Tisso vijjā anuppattā,
kataṃ buddhassa sāsanaṃ.

333 Anujānāhi me ayye,
icche sāvatthi gantave;
Sīhanādaṃ nadissāmi,
buddhaseṭṭhassa santike".

334 "Passa sundari satthāraṃ,
hemavaṇṇaṃ harittacaṃ;
Adantānaṃ dametāraṃ,
sambuddhamakutobhayaṃ".

335 "Passa sundarimāyantiṃ,
vippamuttaṃ nirūpadhiṃ;
Vītarāgaṃ visaṃyuttaṃ,
katakiccamanāsavaṃ.

336 Bārāṇasito nikkhamma,
tava santikamāgatā;
Sāvikā te mahāvīra,
pāde vandati sundarī.

337 Tuvaṃ buddho tuvaṃ satthā,
tuyhaṃ dhītāmhi brāhmaṇa;
Orasā mukhato jātā,
katakiccā anāsavā".

338 "Tassā te svāgataṃ bhadde,
tato te adurāgataṃ;
Evañhi dantā āyanti,
satthu pādāni vandikā;
Vītarāgā visaṃyuttā,
katakiccā anāsavā".

Subhākammāradhītutherīgāthā

339 "Daharāhaṃ suddhavasanā,
yaṃ pure dhammamassuṇiṃ;
Tassā me appamattāya,
saccābhisamayo ahu.

340 Tatohaṃ sabbakāmesu,
bhusaṃ aratimajjhagaṃ;
Sakkāyasmiṃ bhayaṃ disvā,
nekkhammameva pīhaye.

341 Hitvānahaṃ ñātigaṇaṃ,
dāsakammakarāni ca;
Gāmakhettāni phītāni,
ramaṇīye pamodite.

342 Pahāyahaṃ pabbajitā,
sāpateyyamanappakaṃ;
Evaṃ saddhāya nikkhamma,
saddhamme suppavedite.

343 Netaṃ assa patirūpaṃ,
Ākiñcaññañhi patthaye;
Yo jātarūpaṃ rajataṃ,
Chaḍḍetvā punarāgame.

344 Rajataṃ jātarūpaṃ vā,
na bodhāya na santiyā;
Netaṃ samaṇasāruppaṃ,
na etaṃ ariyaddhanaṃ.

345 Lobhanaṃ madanañcetaṃ,
mohanaṃ rajavaḍḍhanaṃ;
Sāsankaṃ bahuāyāsaṃ,
natthi cettha dhuvaṃ ṭhiti.

346 Ettha rattā pamattā ca,
saṃkiliṭṭhamanā narā;
Aññamaññena byāruddhā,
puthu kubbanti medhagaṃ.

347 Vadho bandho parikleso,
jāni sokapariddavo;
Kāmesu adhipannānaṃ,
dissate byasanaṃ bahuṃ.

348 Taṃ maṃ ñātī amittāva,
kiṃ vo kāmesu yuñjatha;
Jānātha maṃ pabbajitaṃ,
kāmesu bhayadassiniṃ.

349 Na hiraññasuvaṇṇena,
parikkhīyanti āsavā;
Amittā vadhakā kāmā,
sapattā sallabandhanā.

350 Taṃ maṃ ñātī amittāva,
kiṃ vo kāmesu yuñjatha;
Jānātha maṃ pabbajitaṃ,
muṇḍaṃ sanghāṭipārutaṃ.

351 Uttiṭṭhapiṇḍo uñcho ca,
paṃsukūlañca cīvaraṃ;
Etaṃ kho mama sāruppaṃ,
anagārūpanissayo.

352 Vantā mahesīhi kāmā,
ye dibbā ye ca mānusā;
Khemaṭṭhāne vimuttā te,
pattā te acalaṃ sukhaṃ.

353 Māhaṃ kāmehi sangacchiṃ,
yesu tāṇaṃ na vijjati;
Amittā vadhakā kāmā,
aggikkhandhūpamā dukhā.

354 Paripantho esa bhayo,
savighāto sakaṇṭako;
Gedho suvisamo ceso,
mahanto mohanāmukho.

355 Upasaggo bhīmarūpo,
kāmā sappasirūpamā;
Ye bālā abhinandanti,
andhabhūtā puthujjanā.

356 Kāmapankena sattā hi,
bahū loke aviddasū;
Pariyantaṃ na jānanti,
jātiyā maraṇassa ca.

357 Duggatigamanaṃ maggaṃ,
manussā kāmahetukaṃ;
Bahuṃ ve paṭipajjanti,
attano rogamāvahaṃ.

358 Evaṃ amittajananā,
tāpanā saṃkilesikā;
Lokāmisā bandhanīyā,
kāmā maraṇabandhanā.

359 Ummādanā ullapanā,
kāmā cittappamaddino;
Sattānaṃ saṃkilesāya,
khippaṃ mārena oḍḍitaṃ.

360 Anantādīnavā kāmā,
bahudukkhā mahāvisā;
Appassādā raṇakarā,
sukkapakkhavisosanā.

361 Sāhaṃ etādisaṃ katvā,
byasanaṃ kāmahetukaṃ;
Na taṃ paccāgamissāmi,
nibbānābhiratā sadā.

362 Raṇaṃ karitvā kāmānaṃ,
sītibhāvābhikankhinī;
Appamattā vihassāmi,
sabbasaṃyojanakkhaye.

363 Asokaṃ virajaṃ khemaṃ,
ariyaṭṭhangikaṃ ujuṃ;
Taṃ maggaṃ anugacchāmi,
yena tiṇṇā mahesino".

364 "Imaṃ passatha dhammaṭṭhaṃ,
subhaṃ kammāradhītaraṃ;
Anejaṃ upasampajja,
rukkhamūlamhi jhāyati.

365 Ajjaṭṭhamī pabbajitā,
saddhā saddhammasobhanā;
Vinītuppalavaṇṇāya,
tevijjā maccuhāyinī.

366 Sāyaṃ bhujissā anaṇā,
bhikkhunī bhāvitindriyā;
Sabbayogavisaṃyuttā,
katakiccā anāsavā".

367 Taṃ sakko devasanghena,
upasankamma iddhiyā;
Namassati bhūtapati,
subhaṃ kammāradhītaranti.