Khadiravaniyarevatattheragāthā

645 "Yadā ahaṃ pabbajito,
agārasmānagāriyaṃ;
Nābhijānāmi sankappaṃ,
anariyaṃ dosasaṃhitaṃ.

646 ‘Ime haññantu vajjhantu,
dukkhaṃ pappontu pāṇino’;
Sankappaṃ nābhijānāmi,
imasmiṃ dīghamantare.

647 Mettañca abhijānāmi,
appamāṇaṃ subhāvitaṃ;
Anupubbaṃ paricitaṃ,
yathā buddhena desitaṃ.

648 Sabbamitto sabbasakho,
sabbabhūtānukampako;

649 Asaṃhīraṃ asaṃkuppaṃ,
cittaṃ āmodayāmahaṃ;
Brahmavihāraṃ bhāvemi,
akāpurisasevitaṃ.

650 Avitakkaṃ samāpanno,
sammāsambuddhasāvako;
Ariyena tuṇhībhāvena,
upeto hoti tāvade.

651 Yathāpi pabbato selo,
acalo suppatiṭṭhito;
Evaṃ mohakkhayā bhikkhu,
pabbatova na vedhati.

652 Anangaṇassa posassa,
niccaṃ sucigavesino;
Vālaggamattaṃ pāpassa,
abbhamattaṃva khāyati.

653 Nagaraṃ yathā paccantaṃ,
guttaṃ santarabāhiraṃ;
Evaṃ gopetha attānaṃ,
khaṇo vo mā upaccagā.

654 Nābhinandāmi maraṇaṃ,
nābhinandāmi jīvitaṃ;
Kālañca paṭikankhāmi,
nibbisaṃ bhatako yathā.

655 Nābhinandāmi maraṇaṃ,
… pe …
sampajāno patissato.

656 Pariciṇṇo mayā satthā,
kataṃ buddhassa sāsanaṃ;
Ohito garuko bhāro,
bhavanetti samūhatā.

657 Yassa catthāya pabbajito,
agārasmānagāriyaṃ;
So me attho anuppatto,
sabbasaṃyojanakkhayo.

658 Sampādethappamādena,
esā me anusāsanī;
Handāhaṃ parinibbissaṃ,
vippamuttomhi sabbadhī"ti.

Godattattheragāthā

659 "Yathāpi bhaddo ājañño,
dhure yutto dhurassaho;
Mathito atibhārena,

660 Evaṃ paññāya ye tittā,
samuddo vārinā yathā;
Na pare atimaññanti,
ariyadhammova pāṇinaṃ.

661 Kāle kālavasaṃ pattā,
bhavābhavavasaṃ gatā;
Narā dukkhaṃ nigacchanti,
tedha socanti

662 Unnatā sukhadhammena,
dukkhadhammena conatā;
Dvayena bālā haññanti,
yathābhūtaṃ adassino.

663 Ye ca dukkhe sukhasmiñca,
majjhe Ṭhitā te indakhīlova,
na te unnataonatā.

664 Na heva lābhe nālābhe,
na yase na ca kittiyā;
Na nindāyaṃ pasaṃsāya,
na te dukkhe sukhamhi ca.

665 Sabbattha te na limpanti,
udabinduva pokkhare;
Sabbattha sukhitā dhīrā,
sabbattha aparājitā.

666 Dhammena ca alābho yo,
yo ca lābho adhammiko;
Alābho dhammiko seyyo,
yañce lābho adhammiko.

667 Yaso ca appabuddhīnaṃ,
viññūnaṃ ayaso ca yo;
Ayasova seyyo viññūnaṃ,
na yaso appabuddhinaṃ.

668 Dummedhehi pasaṃsā ca,
viññūhi garahā ca yā;
Garahāva seyyo viññūhi,
yañce bālappasaṃsanā.

669 Sukhañca kāmamayikaṃ,
dukkhañca pavivekiyaṃ;
yañce kāmamayaṃ sukhaṃ.

670 Jīvitañca adhammena,
dhammena maraṇañca yaṃ;
Maraṇaṃ dhammikaṃ seyyo,
yañce jīve adhammikaṃ.

671 Kāmakopappahīnā ye,
santacittā bhavābhave;
Caranti loke asitā,
natthi tesaṃ piyāpiyaṃ.

672 Bhāvayitvāna bojjhange,
indriyāni balāni ca;
Pappuyya paramaṃ santiṃ,
parinibbantināsavā"ti.