Subhūtittheragāthā

1 "Channā me kuṭikā sukhā nivātā,
Vassa deva yathāsukhaṃ;
Cittaṃ me susamāhitaṃ vimuttaṃ,
Ātāpī viharāmi vassa devā"ti.

Mahākoṭṭhikattheragāthā

2 "Upasanto uparato,
mantabhāṇī anuddhato;
Dhunāti pāpake dhamme,
dumapattaṃva māluto"ti.

Kankhārevatattheragāthā

3 "Paññaṃ imaṃ passa tathāgatānaṃ,
Aggi yathā pajjalito nisīthe;
Ālokadā cakkhudadā bhavanti,
Ye āgatānaṃ vinayanti kankhan"ti.

Puṇṇattheragāthā

4 "Sabbhireva samāsetha,
paṇḍitehatthadassibhi;
Atthaṃ mahantaṃ gambhīraṃ,
duddasaṃ nipuṇaṃ aṇuṃ;
Dhīrā samadhigacchanti,
appamattā vicakkhaṇā"ti.

Dabbattheragāthā

5 "Yo duddamiyo damena danto,
Dabbo santusito vitiṇṇakankho;
Vijitāvī apetabheravo hi,
Dabbo so parinibbuto ṭhitatto"ti.

Sītavaniyattheragāthā

6 "Yo sītavanaṃ upagā bhikkhu,
Eko santusito samāhitatto;
Vijitāvī apetalomahaṃso,
Rakkhaṃ kāyagatāsatiṃ dhitimā"ti.

Bhalliyattheragāthā

7 "Yopānudī maccurājassa senaṃ,
Naḷasetuṃva sudubbalaṃ mahogho;
Vijitāvī apetabheravo hi,
Danto so parinibbuto ṭhitatto"ti.

Vīrattheragāthā

8 "Yo duddamiyo damena danto,
Vīro santusito vitiṇṇakankho;
Vijitāvī apetalomahaṃso,
Vīro so parinibbuto ṭhitatto"ti.

Pilindavacchattheragāthā

9 "Svāgataṃ na durāgataṃ,
Nayidaṃ dumantitaṃ mama;
Saṃvibhattesu dhammesu,
Yaṃ seṭṭhaṃ tadupāgamin"ti.

Puṇṇamāsattheragāthā

10 "Vihari apekkhaṃ idha vā huraṃ vā,
Yo vedagū samito yatatto;
Sabbesu dhammesu anūpalitto,
Lokassa jaññā udayabbayañcā"ti.

Cūḷavacchattheragāthā

11 "Pāmojjabahulo bhikkhu,
dhamme buddhappavedite;
Adhigacche padaṃ santaṃ,
sankhārūpasamaṃ sukhan"ti.

Mahāvacchattheragāthā

12 "Paññābalī sīlavatūpapanno,
Samāhito jhānarato satīmā;
Yadatthiyaṃ bhojanaṃ bhuñjamāno,
Kankhetha kālaṃ idha vītarāgo"ti.

Vanavacchattheragāthā

13 "Nīlabbhavaṇṇā rucirā,
sītavārī sucindharā;
Indagopakasañchannā,
te selā ramayanti man"ti.

Sivakasāmaṇeragāthā

14 "Upajjhāyo maṃ avaca,
ito gacchāma sīvaka;
Gāme me vasati kāyo,
araññaṃ me gato mano;
Semānakopi gacchāmi,
natthi sango vijānatan"ti.

Kuṇḍadhānattheragāthā

15 "Pañca chinde pañca jahe,
pañca cuttari bhāvaye;
Pañcasangātigo bhikkhu,
oghatiṇṇoti vuccatī"ti.

Belaṭṭhasīsattheragāthā

16 "Yathāpi bhaddo ājañño,
nangalāvattanī sikhī;
Gacchati appakasirena,
evaṃ rattindivā mama;
Gacchanti appakasirena,
sukhe laddhe nirāmise"ti.

Dāsakattheragāthā

17 "Middhī yadā hoti mahagghaso ca,
Niddāyitā samparivattasāyī;
Mahāvarāhova nivāpapuṭṭho,
Punappunaṃ gabbhamupeti mando"ti.

Singālapituttheragāthā

18 "Ahu buddhassa dāyādo,
bhikkhu bhesakaḷāvane;
Kevalaṃ aṭṭhisaññāya,
apharī pathaviṃ imaṃ;
Maññehaṃ kāmarāgaṃ so,
khippameva pahissatī"ti.

Kulattheragāthā

19 "Udakañhi nayanti nettikā,
Usukārā namayanti tejanaṃ;
Dāruṃ namayanti tacchakā,
Attānaṃ damayanti subbatā"ti.

Ajitattheragāthā

20 "Maraṇe me bhayaṃ natthi,
nikanti natthi jīvite;
Sandehaṃ nikkhipissāmi,
sampajāno paṭissato"ti.

Nigrodhattheragāthā

21 "Nāhaṃ bhayassa bhāyāmi,
Satthā no amatassa kovido;
Yattha bhayaṃ nāvatiṭṭhati,
Tena maggena vajanti bhikkhavo"ti.

Cittakattheragāthā

22 "Nīlā sugīvā sikhino,
Morā kārambhiyaṃ abhinadanti;
Te sītavātakīḷitā,
Suttaṃ jhāyaṃ nibodhentī"ti.

Gosālattheragāthā

23 "Ahaṃ kho veḷugumbasmiṃ,
bhutvāna madhupāyasaṃ;
Padakkhiṇaṃ sammasanto,
khandhānaṃ udayabbayaṃ;
Sānuṃ paṭigamissāmi,
vivekamanubrūhayan"ti.

Sugandhattheragāthā

24 "Anuvassiko pabbajito,
passa dhammasudhammataṃ;
Tisso vijjā anuppattā,
kataṃ buddhassa sāsanan"ti.

Nandiyattheragāthā

25 "Obhāsajātaṃ phalagaṃ,
cittaṃ yassa abhiṇhaso;
Tādisaṃ bhikkhumāsajja,
kaṇha dukkhaṃ nigacchasī"ti.

Abhayattheragāthā

26 "Sutvā subhāsitaṃ vācaṃ,
buddhassādiccabandhuno;
Paccabyadhiṃ hi nipuṇaṃ,
vālaggaṃ usunā yathā"ti.

Lomasakangiyattheragāthā

27 "Dabbaṃ kusaṃ poṭakilaṃ,
usīraṃ muñjapabbajaṃ;
Urasā panudissāmi,
vivekamanubrūhayan"ti.

Jambugāmikaputtattheragāthā

28 "Kacci no vatthapasuto,
Kacci no bhūsanārato;
Kacci sīlamayaṃ gandhaṃ,
Kiṃ tvaṃ vāyasi netarā pajā"ti.

Hāritattheragāthā

29 "Samunnamayamattānaṃ,
usukārova tejanaṃ;
Cittaṃ ujuṃ karitvāna,
avijjaṃ bhinda hāritā"ti.

Uttiyattheragāthā

30 "Ābādhe me samuppanne,
sati me udapajjatha;
Ābādho me samuppanno,
kālo me nappamajjitun"ti.

Gahvaratīriyattheragāthā

31 "Phuṭṭho ḍaṃsehi makasehi,
araññasmiṃ brahāvane;
Nāgo saṃgāmasīseva,
sato tatrādhivāsaye"ti.

Suppiyattheragāthā

32 "Ajaraṃ jīramānena,
tappamānena nibbutiṃ;
Nimiyaṃ paramaṃ santiṃ,
yogakkhemaṃ anuttaran"ti.

Sopākattheragāthā

33 "Yathāpi ekaputtasmiṃ,
piyasmiṃ kusalī siyā;
Evaṃ sabbesu pāṇesu,
sabbattha kusalo siyā"ti.

Posiyattheragāthā

34 "Anāsannavarā etā,
niccameva vijānatā;
Gāmā araññamāgamma,
tato gehaṃ upāvisi;
Tato uṭṭhāya pakkāmi,
anāmantetvā posiyo"ti.

Sāmaññakānittheragāthā

35 "Sukhaṃ sukhattho labhate tadācaraṃ,
Kittiñca pappoti yasassa vaḍḍhati;
Yo ariyamaṭṭhangikamañjasaṃ ujuṃ,
Bhāveti maggaṃ amatassa pattiyā"ti.

Kumāputtattheragāthā

36 "Sādhu sutaṃ sādhu caritakaṃ,
Sādhu sadā aniketavihāro;
Atthapucchanaṃ padakkhiṇakammaṃ,
Etaṃ sāmaññamakiñcanassā"ti.

Kumāputtasahāyakattheragāthā

37 "Nānājanapadaṃ yanti,
Vicarantā asaññatā;
Samādhiñca virādhenti,
Kiṃsu raṭṭhacariyā karissati;
Tasmā vineyya sārambhaṃ,
Jhāyeyya apurakkhato"ti.

Gavampatittheragāthā

38 "Yo iddhiyā sarabhuṃ aṭṭhapesi,
So gavampati asito anejo;
Taṃ sabbasangātigataṃ mahāmuniṃ,
Devā namassanti bhavassa pāragun"ti.

Tissattheragāthā

39 "Sattiyā viya omaṭṭho,
ḍayhamānova matthake;
Kāmarāgappahānāya,
sato bhikkhu paribbaje"ti.

Vaḍḍhamānattheragāthā

40 "Sattiyā viya omaṭṭho,
ḍayhamānova matthake;
Bhavarāgappahānāya,
sato bhikkhu paribbaje"ti.

Sirivaḍḍhattheragāthā

41 "Vivaramanupatanti vijjutā,
Vebhārassa ca paṇḍavassa ca;
Nagavivaragato ca jhāyati,
Putto appaṭimassa tādino"ti.

Khadiravaniyattheragāthā

42 "Cāle upacāle sīsūpacāle (),
Patissatā nu kho viharatha;
Āgato vo vālaṃ viya vedhī"ti.

Sumangalattheragāthā

43 "Sumuttiko sumuttiko,
Sāhu sumuttikomhi tīhi khujjakehi;
Asitāsu mayā nangalāsu mayā,
Khuddakuddālāsu mayā.
Yadipi idhameva idhameva,
Atha vāpi alameva alameva;
Jhāya sumangala jhāya sumangala,
Appamatto vihara sumangalā"ti.

Sānuttheragāthā

44 "Mataṃ vā amma rodanti,
Yo vā jīvaṃ na dissati;
Jīvantaṃ maṃ amma passantī,
Kasmā maṃ amma rodasī"ti.

Ramaṇīyavihārittheragāthā

45 "Yathāpi bhaddo ājañño,
khalitvā patitiṭṭhati;
Evaṃ dassanasampannaṃ,
sammāsambuddhasāvakan"ti.

Samiddhittheragāthā

46 "Saddhāyāhaṃ pabbajito,
Agārasmānagāriyaṃ;
Sati paññā ca me vuḍḍhā,
Cittañca susamāhitaṃ;
Kāmaṃ karassu rūpāni,
Neva maṃ byādhayissasī"ti.

Ujjayattheragāthā

47 "Namo te buddha vīratthu,
vippamuttosi sabbadhi;
Tuyhāpadāne viharaṃ,
viharāmi anāsavo"ti.

Sañjayattheragāthā

48 "Yato ahaṃ pabbajito,
Agārasmānagāriyaṃ;
Nābhijānāmi sankappaṃ,
Anariyaṃ dosasaṃhitan"ti.

Rāmaṇeyyakattheragāthā

49 "Cihacihābhinadite,
sippikābhirutehi ca;
Na me taṃ phandati cittaṃ,
ekattanirataṃ hi me"ti.

Vimalattheragāthā

50 "Dharaṇī ca siñcati vāti,
Māluto vijjutā carati nabhe;
Upasamanti vitakkā,
Cittaṃ susamāhitaṃ mamā"ti.

Godhikattheragāthā

51 "Vassati devo yathā sugītaṃ,
Channā me kuṭikā sukhā nivātā;
Cittaṃ susamāhitañca mayhaṃ,
Atha ce patthayasi pavassa devā"ti.

Subāhuttheragāthā

52 "Vassati devo yathā sugītaṃ,
Channā me kuṭikā sukhā nivātā;
Cittaṃ susamāhitañca kāye,
Atha ce patthayasi pavassa devā"ti.

Valliyattheragāthā

53 "Vassati devo yathā sugītaṃ,
Channā me kuṭikā sukhā nivātā;
Tassaṃ viharāmi appamatto,
Atha ce patthayasi pavassa devā"ti.

Uttiyattheragāthā

54 "Vassati devo yathā sugītaṃ,
Channā me kuṭikā sukhā nivātā;
Tassaṃ viharāmi adutiyo,
Atha ce patthayasi pavassa devā"ti.

Añjanavaniyattheragāthā

55 "Āsandiṃ kuṭikaṃ katvā,
ogayha añjanaṃ vanaṃ;
Tisso vijjā anuppattā,
kataṃ buddhassa sāsanan"ti.

Kuṭivihārittheragāthā

56 "Ko kuṭikāyaṃ bhikkhu kuṭikāyaṃ,
Vītarāgo susamāhitacitto;
Evaṃ jānāhi āvuso,
Amoghā te kuṭikā katā"ti.

Dutiyakuṭivihārittheragāthā

57 "Ayamāhu purāṇiyā kuṭi,
Aññaṃ patthayase navaṃ kuṭiṃ;
Āsaṃ kuṭiyā virājaya,
Dukkhā bhikkhu puna navā kuṭī"ti.

Ramaṇīyakuṭikattheragāthā

58 "Ramaṇīyā me kuṭikā,
Saddhādeyyā manoramā;
Na me attho kumārīhi,
Yesaṃ attho tahiṃ gacchatha nāriyo"ti.

Kosalavihārittheragāthā

59 "Saddhāyāhaṃ pabbajito,
araññe me kuṭikā katā;
Appamatto ca ātāpī,
sampajāno patissato"ti.

Sīvalittheragāthā

60 "Te me ijjhiṃsu sankappā,
yadattho pāvisiṃ kuṭiṃ;
Vijjāvimuttiṃ paccesaṃ,
mānānusayamujjahan"ti.

Vappattheragāthā

61 "Passati passo passantaṃ,
apassantañca passati;
Apassanto apassantaṃ,
passantañca na passatī"ti.

Vajjiputtattheragāthā

62 "Ekakā mayaṃ araññe viharāma,
Apaviddhaṃva vanasmiṃ dārukaṃ;
Tassa me bahukā pihayanti,
Nerayikā viya saggagāminan"ti.

Pakkhattheragāthā

63 "Cutā patanti patitā,
giddhā ca punarāgatā;
Kataṃ kiccaṃ rataṃ rammaṃ,
sukhenanvāgataṃ sukhan"ti.

Vimalakoṇḍaññattheragāthā

64 "Dumavhayāya uppanno,
jāto paṇḍaraketunā;
Ketuhā ketunāyeva,
mahāketuṃ padhaṃsayī"ti.

Ukkhepakatavacchattheragāthā

65 "Ukkhepakatavacchassa,
Sankalitaṃ bahūhi vassehi;
Taṃ bhāsati gahaṭṭhānaṃ,
Sunisinno uḷārapāmojjo"ti.

Meghiyattheragāthā

66 "Anusāsi mahāvīro,
sabbadhammāna pāragū;
Tassāhaṃ dhammaṃ sutvāna,
vihāsiṃ santike sato;
Tisso vijjā anuppattā,
kataṃ buddhassa sāsanan"ti.

Ekadhammasavanīyattheragāthā

67 "Kilesā jhāpitā mayhaṃ,
bhavā sabbe samūhatā;
Vikkhīṇo jātisaṃsāro,
natthi dāni punabbhavo"ti.

Ekudāniyattheragāthā

68 "Adhicetaso appamajjato,
Munino monapathesu sikkhato;
Sokā na bhavanti tādino,
Upasantassa sadā satīmato"ti.

Channattheragāthā

69 "Sutvāna dhammaṃ mahato mahārasaṃ,
Sabbaññutaññāṇavarena desitaṃ;
Maggaṃ papajjiṃ amatassa pattiyā,
So yogakkhemassa pathassa kovido"ti.

Puṇṇattheragāthā

70 "Sīlameva idha aggaṃ,
paññavā pana uttamo;
Manussesu ca devesu,
sīlapaññāṇato jayan"ti.

Vacchapālattheragāthā

71 "Susukhumanipuṇatthadassinā,
Matikusalena nivātavuttinā;
Saṃsevitavuddhasīlinā,
Nibbānaṃ na hi tena dullabhan"ti.

Ātumattheragāthā

72 "Yathā kaḷīro susu vaḍḍhitaggo,
Dunnikkhamo hoti pasākhajāto;
Evaṃ ahaṃ bhariyāyānitāya,
Anumaññaṃ maṃ pabbajitomhi dānī"ti.

Māṇavattheragāthā

73 "Jiṇṇañca disvā dukhitañca byādhitaṃ,
Matañca disvā gatamāyusankhayaṃ;
Tato ahaṃ nikkhamitūna pabbajiṃ,
Pahāya kāmāni manoramānī"ti.

Suyāmanattheragāthā

74 "Kāmacchando ca byāpādo,
Thinamiddhañca bhikkhuno;
Uddhaccaṃ vicikicchā ca,
Sabbasova na vijjatī"ti.

Susāradattheragāthā

75 "Sādhu suvihitāna dassanaṃ,
Kankhā chijjati buddhi vaḍḍhati;
Bālampi karonti paṇḍitaṃ,
Tasmā sādhu sataṃ samāgamo"ti.

Piyañjahattheragāthā

76 "Uppatantesu nipate,
nipatantesu uppate;
Vase avasamānesu,
ramamānesu no rame"ti.

Hatthārohaputtattheragāthā

77 "Idaṃ pure cittamacāri cārikaṃ,
Yenicchakaṃ yatthakāmaṃ yathāsukhaṃ;
Tadajjahaṃ niggahessāmi yoniso,
Hatthippabhinnaṃ viya ankusaggaho"ti.

Meṇḍasirattheragāthā

78 "Anekajātisaṃsāraṃ,
sandhāvissaṃ anibbisaṃ;
Tassa me dukkhajātassa,
dukkhakkhandho aparaddho"ti.

Rakkhitattheragāthā

79 "Sabbo rāgo pahīno me,
sabbo doso samūhato;
Sabbo me vigato moho,
sītibhūtosmi nibbuto"ti.

Uggattheragāthā

80 "Yaṃ mayā pakataṃ kammaṃ,
appaṃ vā yadi vā bahuṃ;
Sabbametaṃ parikkhīṇaṃ,
natthi dāni punabbhavo"ti.

Samitiguttattheragāthā

81 "Yaṃ mayā pakataṃ pāpaṃ,
pubbe aññāsu jātisu;
Idheva taṃ vedanīyaṃ,
vatthu aññaṃ na vijjatī"ti.

Kassapattheragāthā

82 "Yena yena subhikkhāni,
sivāni abhayāni ca;
Tena puttaka gacchassu,
mā sokāpahato bhavā"ti.

Sīhattheragāthā

83 "Sīhappamatto vihara,
rattindivamatandito;
Bhāvehi kusalaṃ dhammaṃ,
jaha sīghaṃ samussayan"ti.

Nītattheragāthā

84 "Sabbarattiṃ supitvāna,
divā sangaṇike rato;
Kudāssu nāma dummedho,
dukkhassantaṃ karissatī"ti.

Sunāgattheragāthā

85 "Cittanimittassa kovido,
Pavivekarasaṃ vijāniya;
Jhāyaṃ nipako patissato,
Adhigaccheyya sukhaṃ nirāmisan"ti.

Nāgitattheragāthā

86 "Ito bahiddhā puthu aññavādinaṃ,
Maggo na nibbānagamo yathā ayaṃ;
Itissu saṃghaṃ bhagavānusāsati,
Satthā sayaṃ pāṇitaleva dassayan"ti.

Paviṭṭhattheragāthā

87 "Khandhā diṭṭhā yathābhūtaṃ,
bhavā sabbe padālitā;
Vikkhīṇo jātisaṃsāro,
natthi dāni punabbhavo"ti.

Ajjunattheragāthā

88 "Asakkhiṃ vata attānaṃ,
uddhātuṃ udakā thalaṃ;
Vuyhamāno mahogheva,
saccāni paṭivijjhahan"ti.

(Paṭhama) Devasabhattheragāthā

89 "Uttiṇṇā pankapalipā,
pātālā parivajjitā;
Mutto oghā ca ganthā ca,
sabbe mānā visaṃhatā"ti.

Sāmidattattheragāthā

90 "Pañcakkhandhā pariññātā,
tiṭṭhanti chinnamūlakā;
Vikkhīṇo jātisaṃsāro,
natthi dāni punabbhavo"ti.

Paripuṇṇakattheragāthā

91 "Na tathā mataṃ satarasaṃ,
Sudhannaṃ yaṃ mayajja paribhuttaṃ;
Aparimitadassinā gotamena,
Buddhena desito dhammo"ti.

Vijayattheragāthā

92 "Yassāsavā parikkhīṇā,
āhāre ca anissito;
Suññato animitto ca,
vimokkho yassa gocaro;
Ākāseva sakuntānaṃ,
padaṃ tassa durannayan"ti.

Erakattheragāthā

93 "Dukkhā kāmā eraka,
Na sukhā kāmā eraka;
Yo kāme kāmayati,
Dukkhaṃ so kāmayati eraka;
Yo kāme na kāmayati,
Dukkhaṃ so na kāmayati erakā"ti.

Mettajittheragāthā

94 "Namo hi tassa bhagavato,
sakyaputtassa sirīmato;
Tenāyaṃ aggappattena,
aggadhammo sudesito"ti.

Cakkhupālattheragāthā

95 "Andhohaṃ hatanettosmi,
kantāraddhānapakkhando;
Sayamānopi gacchissaṃ,
na sahāyena pāpenā"ti.

Khaṇḍasumanattheragāthā

96 "Ekapupphaṃ cajitvāna,
asīti vassakoṭiyo;
Saggesu paricāretvā,
sesakenamhi nibbuto"ti.

Tissattheragāthā

97 "Hitvā satapalaṃ kaṃsaṃ,
Sovaṇṇaṃ satarājikaṃ;
Aggahiṃ mattikāpattaṃ,
Idaṃ dutiyābhisecanan"ti.

Abhayattheragāthā

98 "Rūpaṃ disvā sati muṭṭhā,
Piyaṃ nimittaṃ manasikaroto;
Sārattacitto vedeti,
Tañca ajjhosa tiṭṭhati;
Tassa vaḍḍhanti āsavā,
Bhavamūlopagāmino"ti.

Uttiyattheragāthā

99 "Saddaṃ sutvā sati muṭṭhā,
Piyaṃ nimittaṃ manasikaroto;
Sārattacitto vedeti,
Tañca ajjhosa tiṭṭhati;
Tassa vaḍḍhanti āsavā,
Saṃsāraṃ upagāmino"ti.

(Dutiya) Devasabhattheragāthā

100 "Sammappadhānasampanno,
Satipaṭṭhānagocaro;
Vimuttikusumasañchanno,
Parinibbissatyanāsavo"ti.

Belaṭṭhānikattheragāthā

101 "Hitvā gihittaṃ anavositatto,
Mukhanangalī odariko kusīto;
Mahāvarāhova nivāpapuṭṭho,
Punappunaṃ gabbhamupeti mando"ti.

Setucchattheragāthā

102 "Mānena vañcitāse,
Sankhāresu sankilissamānāse;
Lābhālābhena mathitā,
Samādhiṃ nādhigacchantī"ti.

Bandhurattheragāthā

103 "Nāhaṃ etena atthiko,
Sukhito dhammarasena tappito;
Pitvā rasaggamuttamaṃ,
Na ca kāhāmi visena santhavan"ti.

Khitakattheragāthā

104 "Lahuko vata me kāyo,
Phuṭṭho ca pītisukhena vipulena;
Tūlamiva eritaṃ mālutena,
Pilavatīva me kāyo"ti.

Malitavambhattheragāthā

105 "Ukkaṇṭhitopi na vase,
ramamānopi pakkame;
Na tvevānatthasaṃhitaṃ,
vase vāsaṃ vicakkhaṇo"ti.

Suhemantattheragāthā

106 "Satalingassa atthassa,
satalakkhaṇadhārino;
Ekangadassī dummedho,
satadassī ca paṇḍito"ti.

Dhammasavattheragāthā

107 "Pabbajiṃ tulayitvāna,
agārasmānagāriyaṃ;
Tisso vijjā anuppattā,
kataṃ buddhassa sāsanan"ti.

Dhammasavapituttheragāthā

108 "Sa vīsavassasatiko,
pabbajiṃ anagāriyaṃ;
Tisso vijjā anuppattā,
kataṃ buddhassa sāsanan"ti.

Saṃgharakkhitattheragāthā

109 "Na nūnāyaṃ paramahitānukampino,
Rahogato anuvigaṇeti sāsanaṃ;
Tathāhayaṃ viharati pākatindriyo,
Migī yathā taruṇajātikā vane"ti.

Usabhattheragāthā

110 "Nagā nagaggesu susaṃvirūḷhā,
Udaggameghena navena sittā;
Vivekakāmassa araññasaññino,
Janeti bhiyyo usabhassa kalyatan"ti.

Jentattheragāthā

111 "Duppabbajjaṃ ve duradhivāsā gehā,
Dhammo gambhīro duradhigamā bhogā;
Kicchā vutti no itarītareneva,
Yuttaṃ cintetuṃ satatamaniccatan"ti.

Vacchagottattheragāthā

112 "Tevijjohaṃ mahājhāyī,
cetosamathakovido;
Sadattho me anuppatto,
kataṃ buddhassa sāsanan"ti.

Vanavacchattheragāthā

113 "Acchodikā puthusilā,
gonangulamigāyutā;
Ambusevālasañchannā,
te selā ramayanti man"ti.

Adhimuttattheragāthā

114 "Kāyaduṭṭhullagaruno,
hiyyamānamhi jīvite;
Sarīrasukhagiddhassa,
kuto samaṇasādhutā"ti.

Mahānāmattheragāthā

115 "Esāvahiyyase pabbatena,
Bahukuṭajasallakikena;
Nesādakena girinā,
Yasassinā paricchadenā"ti.

Pārāpariyattheragāthā

116 "Chaphassāyatane hitvā,
guttadvāro susaṃvuto;
Aghamūlaṃ vamitvāna,
patto me āsavakkhayo"ti.

Yasattheragāthā

117 "Suvilitto suvasano,
sabbābharaṇabhūsito;
Tisso vijjā ajjhagamiṃ,
kataṃ buddhassa sāsanan"ti.

Kimilattheragāthā

118 "Abhisattova nipatati,
Vayo rūpaṃ aññamiva tatheva santaṃ;
Tasseva sato avippavasato,
Aññasseva sarāmi attānan"ti.

Vajjiputtattheragāthā

119 "Rukkhamūlagahanaṃ pasakkiya,
Nibbānaṃ hadayasmiṃ opiya;
Jhāya gotama mā ca pamādo,
Kiṃ te biḷibiḷikā karissatī"ti.

Isidattattheragāthā

120 "Pañcakkhandhā pariññātā,
tiṭṭhanti chinnamūlakā;
Dukkhakkhayo anuppatto,
patto me āsavakkhayo"ti.