Upasīvamāṇavapucchā

(iccāyasmā upasīvo):

1069 "Eko ahaṃ sakka mahantamoghaṃ,
Anissito no visahāmi tārituṃ;
Ārammaṇaṃ brūhi samantacakkhu,
Yaṃ nissito oghamimaṃ tareyyaṃ".

(upasīvāti bhagavā):
1070 "Ākiñcaññaṃ pekkhamāno satimā,
Natthīti nissāya tarassu oghaṃ;
Kāme pahāya virato kathāhi,
Taṇhakkhayaṃ nattamahābhipassa".

(iccāyasmā upasīvo):
1071 "Sabbesu kāmesu yo vītarāgo,
Ākiñcaññaṃ nissito hitvā maññaṃ;
Saññāvimokkhe parame vimutto,
Tiṭṭhe nu so tattha anānuyāyī".

(upasīvāti bhagavā):
1072 "Sabbesu kāmesu yo vītarāgo,
Ākiñcaññaṃ nissito hitvā maññaṃ;
Saññāvimokkhe parame vimutto,
Tiṭṭheyya so tattha anānuyāyī".

1073 "Tiṭṭhe ce so tattha anānuyāyī,
Pūgampi vassānaṃ samantacakkhu;
Tattheva so sītisiyā vimutto,
Cavetha viññāṇaṃ tathāvidhassa".

(upasīvāti bhagavā):
1074 "Accī yathā vātavegena khittā,
Atthaṃ paleti na upeti sankhaṃ;
Evaṃ munī nāmakāyā vimutto,
Atthaṃ paleti na upeti sankhaṃ".

1075 "Atthangato so uda vā so natthi,
Udāhu ve sassatiyā arogo;
Taṃ me munī sādhu viyākarohi,
Tathā hi te vidito esa dhammo".

(upasīvāti bhagavā):
1076 "Atthangatassa na pamāṇamatthi,
Yena naṃ vajjuṃ taṃ tassa natthi;
Sabbesu dhammesu samohatesu,
Samūhatā vādapathāpi sabbe"ti.

Upasīvamāṇavapucchā chaṭṭhī.