Dhotakamāṇavapucchā

(iccāyasmā dhotako):

1061 "Pucchāmi taṃ bhagavā brūhi metaṃ,
Vācābhikankhāmi mahesi tuyhaṃ;
Tava sutvāna nigghosaṃ,
Sikkhe nibbānamattano".

(dhotakāti bhagavā):
1062 "Tenahātappaṃ karohi,
Idheva nipako sato;
Ito sutvāna nigghosaṃ,
Sikkhe nibbānamattano".

1063 "Passāmahaṃ devamanussaloke,
Akiñcanaṃ brāhmaṇamiriyamānaṃ;
Taṃ taṃ namassāmi samantacakkhu,
Pamuñca maṃ sakka kathankathāhi".

1064 "Nāhaṃ sahissāmi pamocanāya,
Kathankathiṃ dhotaka kañci loke;
Dhammañca seṭṭhaṃ abhijānamāno,
Evaṃ tuvaṃ oghamimaṃ taresi".

1065 "Anusāsa brahme karuṇāyamāno,
Vivekadhammaṃ yamahaṃ vijaññaṃ;
Yathāhaṃ ākāsova abyāpajjamāno,
Idheva santo asito careyyaṃ".

(dhotakāti bhagavā):
1066 "Kittayissāmi te santiṃ,
Diṭṭhe dhamme anītihaṃ;
Yaṃ viditvā sato caraṃ,
Tare loke visattikaṃ".

1067 "Tañcāhaṃ abhinandāmi,
mahesi santimuttamaṃ;
Yaṃ viditvā sato caraṃ,
tare loke visattikaṃ".

(dhotakāti bhagavā):
1068 "Yaṃ kiñci sampajānāsi,
Uddhaṃ adho tiriyañcāpi majjhe;
Etaṃ viditvā sangoti loke,
Bhavābhavāya mākāsi taṇhan"ti.

Dhotakamāṇavapucchā pañcamī.