Ajitamāṇavapucchā

(iccāyasmā ajito):

1032 "Kenassu nivuto loko,
Kenassu nappakāsati;
Kissābhilepanaṃ brūsi,
Kiṃsu tassa mahabbhayaṃ".

(ajitāti bhagavā):
1033 "Avijjāya nivuto loko,
Vevicchā pamādā nappakāsati;
Jappābhilepanaṃ brūmi,
Dukkhamassa mahabbhayaṃ".

(iccāyasmā ajito):
1034 "Savanti sabbadhi sotā,
Sotānaṃ kiṃ nivāraṇaṃ;
Sotānaṃ saṃvaraṃ brūhi,
Kena sotā pidhiyyare".

(ajitāti bhagavā):
1035 "Yāni sotāni lokasmiṃ,
Sati tesaṃ nivāraṇaṃ;
Sotānaṃ saṃvaraṃ brūmi,
Paññāyete pidhiyyare".

(iccāyasmā ajito):
1036 "Paññā ceva sati yañca,
Nāmarūpañca mārisa;
Etaṃ me puṭṭho pabrūhi,
Katthetaṃ uparujjhati".

1037 "Yametaṃ pañhaṃ apucchi,
ajita taṃ vadāmi te;
Yattha nāmañca rūpañca,
asesaṃ uparujjhati;
Viññāṇassa nirodhena,
etthetaṃ uparujjhati".

1038 "Ye ca sankhātadhammāse,
ye ca sekhā puthū idha;
Tesaṃ me nipako iriyaṃ,
puṭṭho pabrūhi mārisa".

1039 "Kāmesu nābhigijjheyya,
Manasānāvilo siyā;
Kusalo sabbadhammānaṃ,
Sato bhikkhu paribbaje"ti.

Ajitamāṇavapucchā paṭhamā.