1 Ekaṃ samayaṃ bhagavā rājagahe viharati veḷuvane kalandakanivāpe. Assosi kho bilangikabhāradvājo brāhmaṇo:  "bhāradvājagotto kira brāhmaṇo samaṇassa gotamassa santike agārasmā anagāriyaṃ pabbajito"ti kupito anattamano yena bhagavā tenupasankami; upasankamitvā tuṇhībhūto ekamantaṃ aṭṭhāsi. Atha kho bhagavā bilangikassa bhāradvājassa brāhmaṇassa cetasā cetoparivitakkamaññāya bilangikaṃ bhāradvājaṃ brāhmaṇaṃ gāthāya ajjhabhāsi: 

2 "Yo appaduṭṭhassa narassa dussati,
Suddhassa posassa anangaṇassa;
Tameva bālaṃ pacceti pāpaṃ,
Sukhumo rajo paṭivātaṃva khitto"ti.

3 Evaṃ vutte, bilangikabhāradvājo brāhmaṇo bhagavantaṃ etadavoca:  "abhikkantaṃ, bho gotama … pe … abbhaññāsi. Aññataro ca panāyasmā bhāradvājo arahataṃ ahosīti.