1 Ekaṃ samayaṃ bhagavā rājagahe viharati veḷuvane kalandakanivāpe. Assosi kho asurindakabhāradvājo brāhmaṇo:  "bhāradvājagotto brāhmaṇo kira samaṇassa gotamassa santike agārasmā anagāriyaṃ pabbajito"ti kupito anattamano yena bhagavā tenupasankami; upasankamitvā bhagavantaṃ asabbhāhi pharusāhi vācāhi akkosati paribhāsati. Evaṃ vutte, bhagavā tuṇhī ahosi. Atha kho asurindakabhāradvājo brāhmaṇo bhagavantaṃ etadavoca:  "jitosi, samaṇa, jitosi, samaṇā"ti.

2 "Jayaṃ ve maññati bālo,
vācāya pharusaṃ bhaṇaṃ;
Jayañcevassa taṃ hoti,
yā titikkhā vijānato.

3 Tasseva tena pāpiyo,
yo kuddhaṃ paṭikujjhati;
Kuddhaṃ appaṭikujjhanto,
sangāmaṃ jeti dujjayaṃ.

4 Ubhinnamatthaṃ carati,
attano ca parassa ca;
Paraṃ sankupitaṃ ñatvā,
yo sato upasammati.

5 Ubhinnaṃ tikicchantānaṃ,
attano ca parassa ca;
Janā maññanti bāloti,
ye dhammassa akovidā"ti.

6 Evaṃ vutte, asurindakabhāradvājo brāhmaṇo bhagavantaṃ etadavoca:  "abhikkantaṃ, bho gotama … pe … abbhaññāsi. Aññataro ca panāyasmā bhāradvājo arahataṃ ahosīti.