1 Sāvatthinidānaṃ. Atha kho sīsupacālā bhikkhunī pubbaṇhasamayaṃ nivāsetvā … pe … aññatarasmiṃ rukkhamūle divāvihāraṃ nisīdi. Atha kho māro pāpimā yena sīsupacālā bhikkhunī tenupasankami; upasankamitvā sīsupacālaṃ bhikkhuniṃ etadavoca:  "kassa nu tvaṃ, bhikkhuni, pāsaṇḍaṃ rocesī"ti? "Na khvāhaṃ, āvuso, kassaci pāsaṇḍaṃ rocemī"ti.

2 "Kaṃ nu uddissa muṇḍāsi,
Samaṇī viya dissasi;
Na ca rocesi pāsaṇḍaṃ,
Kimiva carasi momūhā"ti.

3 "Ito bahiddhā pāsaṇḍā,
diṭṭhīsu pasīdanti te;
Na tesaṃ dhammaṃ rocemi,
te dhammassa akovidā.

4 Atthi sakyakule jāto,
buddho appaṭipuggalo;
Sabbābhibhū māranudo,
sabbatthamaparājito.

5 Sabbattha mutto asito,
sabbaṃ passati cakkhumā;
Sabbakammakkhayaṃ patto,
vimutto upadhisankhaye;
So mayhaṃ bhagavā satthā,
tassa rocemi sāsanan"ti.

6 Atha kho māro pāpimā "jānāti maṃ sīsupacālā bhikkhunī"ti dukkhī dummano tatthevantaradhāyīti.