1 Sāvatthinidānaṃ. Atha kho vijayā bhikkhunī pubbaṇhasamayaṃ nivāsetvā … pe … aññatarasmiṃ rukkhamūle divāvihāraṃ nisīdi. Atha kho māro pāpimā vijayāya bhikkhuniyā bhayaṃ chambhitattaṃ lomahaṃsaṃ uppādetukāmo samādhimhā cāvetukāmo yena vijayā bhikkhunī tenupasankami; upasankamitvā vijayaṃ bhikkhuniṃ gāthāya ajjhabhāsi: 

2 "Daharā tvaṃ rūpavatī,
ahañca daharo susu;
Pañcangikena turiyena,
ehayyebhiramāmase"ti.

3 Atha kho vijayāya bhikkhuniyā etadahosi:  "ko nu khvāyaṃ manusso vā amanusso vā gāthaṃ bhāsatī"ti? Atha kho vijayāya bhikkhuniyā etadahosi:  "māro kho ayaṃ pāpimā mama bhayaṃ chambhitattaṃ lomahaṃsaṃ uppādetukāmo samādhimhā cāvetukāmo gāthaṃ bhāsatī"ti. Atha kho vijayā bhikkhunī "māro ayaṃ pāpimā" iti viditvā māraṃ pāpimantaṃ gāthāhi paccabhāsi: 

4 "Rūpā saddā rasā gandhā,
phoṭṭhabbā ca manoramā;
Niyyātayāmi tuyheva,
māra nāhaṃ tenatthikā.

5 Iminā pūtikāyena,
bhindanena pabhangunā;
Aṭṭīyāmi harāyāmi,
kāmataṇhā samūhatā.

6 Ye ca rūpūpagā sattā,
ye ca arūpaṭṭhāyino;
Yā ca santā samāpatti,
sabbattha vihato tamo"ti.

7 Atha kho māro pāpimā "jānāti maṃ vijayā bhikkhunī"ti dukkhī dummano tatthevantaradhāyīti.