Saṃyutta Nikāya - The Connected Discourses
Connected Discourses on the Aggregates: SN22:5 Concentration
1 Evaṃ me sutaṃ— … pe … sāvatthiyaṃ … tatra kho … pe … etadavoca: "samādhiṃ, bhikkhave, bhāvetha; samāhito, bhikkhave, bhikkhu yathābhūtaṃ pajānāti. Kiñca yathābhūtaṃ pajānāti? Rūpassa samudayañca atthangamañca, vedanāya samudayañca atthangamañca, saññāya samudayañca atthangamañca, sankhārānaṃ samudayañca atthangamañca, viññāṇassa samudayañca atthangamañca.
2 Ko ca, bhikkhave, rūpassa samudayo, ko vedanāya samudayo, ko saññāya samudayo, ko sankhārānaṃ samudayo, ko viññāṇassa samudayo? Idha, bhikkhave, bhikkhu abhinandati abhivadati ajjhosāya tiṭṭhati.
3 Kiñca abhinandati abhivadati ajjhosāya tiṭṭhati? Rūpaṃ abhinandati abhivadati ajjhosāya tiṭṭhati. Tassa rūpaṃ abhinandato abhivadato ajjhosāya tiṭṭhato uppajjati nandī. Yā rūpe nandī tadupādānaṃ. Tassupādānapaccayā bhavo; bhavapaccayā jāti; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
4 Vedanaṃ abhinandati … pe … saññaṃ abhinandati … sankhāre abhinandati … viññāṇaṃ abhinandati abhivadati ajjhosāya tiṭṭhati. Tassa viññāṇaṃ abhinandato abhivadato ajjhosāya tiṭṭhato uppajjati nandī. Yā viññāṇe nandī tadupādānaṃ. Tassupādānapaccayā bhavo; bhavapaccayā jāti; jātipaccayā … pe … evametassa kevalassa dukkhakkhandhassa samudayo hoti.
5 Ayaṃ, bhikkhave, rūpassa samudayo; ayaṃ vedanāya samudayo; ayaṃ saññāya samudayo; ayaṃ sankhārānaṃ samudayo; ayaṃ viññāṇassa samudayo.
6 Ko ca, bhikkhave, rūpassa atthangamo, ko vedanāya … ko saññāya … ko sankhārānaṃ … ko viññāṇassa atthangamo?
7 Idha, bhikkhave, nābhinandati nābhivadati nājjhosāya tiṭṭhati.
8 Kiñca nābhinandati nābhivadati nājjhosāya tiṭṭhati? Rūpaṃ nābhinandati nābhivadati nājjhosāya tiṭṭhati. Tassa rūpaṃ anabhinandato anabhivadato anajjhosāya tiṭṭhato yā rūpe nandī sā nirujjhati. Tassa nandīnirodhā upādānanirodho; upādānanirodhā bhavanirodho … pe … evametassa kevalassa dukkhakkhandhassa nirodho hoti.
9 Vedanaṃ nābhinandati nābhivadati nājjhosāya tiṭṭhati. Tassa vedanaṃ anabhinandato anabhivadato anajjhosāya tiṭṭhato yā vedanāya nandī sā nirujjhati. Tassa nandīnirodhā upādānanirodho; upādānanirodhā bhavanirodho … pe … evametassa kevalassa dukkhakkhandhassa nirodho hoti.
10 Saññaṃ nābhinandati … pe … sankhāre nābhinandati nābhivadati nājjhosāya tiṭṭhati. Tassa sankhāre anabhinandato anabhivadato anajjhosāya tiṭṭhato yā sankhāresu nandī sā nirujjhati. Tassa nandīnirodhā upādānanirodho; upādānanirodhā bhavanirodho … pe … evametassa kevalassa dukkhakkhandhassa nirodho hoti.
11 Viññāṇaṃ nābhinandati nābhivadati nājjhosāya tiṭṭhati. Tassa viññāṇaṃ anabhinandato anabhivadato anajjhosāya tiṭṭhato yā viññāṇe nandī sā nirujjhati. Tassa nandīnirodhā upādānanirodho … pe … evametassa kevalassa dukkhakkhandhassa nirodho hoti.
12 Ayaṃ, bhikkhave, rūpassa atthangamo, ayaṃ vedanāya atthangamo, ayaṃ saññāya atthangamo, ayaṃ sankhārānaṃ atthangamo, ayaṃ viññāṇassa atthangamo"ti.
Pañcamaṃ.