1 Sāvatthinidānaṃ. Atha kho aññataro bhikkhu yena bhagavā … pe … ekamantaṃ nisinno kho so bhikkhu bhagavantaṃ etadavoca:  "sādhu me, bhante, bhagavā sankhittena dhammaṃ desetu yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyyan"ti. "Yaṃ kho, bhikkhu, anuseti taṃ anumīyati; yaṃ anumīyati tena sankhaṃ gacchati. Yaṃ nānuseti na taṃ anumīyati; yaṃ nānumīyati na tena sankhaṃ gacchatī"ti. "Aññātaṃ, bhagavā, aññātaṃ, sugatā"ti.

2 "Yathā kathaṃ pana tvaṃ, bhikkhu, mayā sankhittena bhāsitassa vitthārena atthaṃ ājānāsī"ti? "Rūpañce, bhante, anuseti taṃ anumīyati; yaṃ anumīyati tena sankhaṃ gacchati. Vedanañce anuseti … saññañce anuseti … sankhāre ce anuseti … viññāṇañce anuseti taṃ anumīyati; yaṃ anumīyati tena sankhaṃ gacchati. Rūpañce, bhante, nānuseti na taṃ anumīyati; yaṃ nānumīyati na tena sankhaṃ gacchati. Vedanañce nānuseti … saññañce nānuseti … sankhāre ce nānuseti … viññāṇañce nānuseti na taṃ anumīyati; yaṃ nānumīyati na tena sankhaṃ gacchati. Imassa khvāhaṃ, bhante, bhagavatā sankhittena bhāsitassa evaṃ vitthārena atthaṃ ājānāmī"ti.

3 "Sādhu sādhu, bhikkhu. Sādhu kho tvaṃ, bhikkhu, mayā sankhittena bhāsitassa vitthārena atthaṃ ājānāsi. Rūpañce, bhikkhu, anuseti taṃ anumīyati; yaṃ anumīyati tena sankhaṃ gacchati. Vedanañce, bhikkhu … saññañce, bhikkhu … sankhāre ce, bhikkhu … viññāṇañce, bhikkhu, anuseti taṃ anumīyati; yaṃ anumīyati tena sankhaṃ gacchati. Rūpañce, bhikkhu, nānuseti na taṃ anumīyati; yaṃ nānumīyati na tena sankhaṃ gacchati. Vedanañce nānuseti … saññañce nānuseti … sankhāre ce nānuseti … viññāṇañce nānuseti na taṃ anumīyati; yaṃ nānumīyati na tena sankhaṃ gacchati. Imassa kho, bhikkhu, mayā sankhittena bhāsitassa evaṃ vitthārena attho daṭṭhabbo"ti … pe … aññataro ca pana so bhikkhu arahataṃ ahosīti.

Catutthaṃ.