1 Sāvatthinidānaṃ. Atha kho aññataro bhikkhu yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca:  "sādhu me, bhante, bhagavā sankhittena dhammaṃ desetu; yamahaṃ bhagavato dhammaṃ sutvā eko vūpakaṭṭho, appamatto ātāpī pahitatto vihareyyan"ti. "Yaṃ kho, bhikkhu, anuseti, tena sankhaṃ gacchati; yaṃ nānuseti, na tena sankhaṃ gacchatī"ti. "Aññātaṃ, bhagavā, aññātaṃ, sugatā"ti.

2 "Yathā kathaṃ pana tvaṃ, bhikkhu, mayā sankhittena bhāsitassa vitthārena atthaṃ ājānāsī"ti? "Rūpañce, bhante, anuseti tena sankhaṃ gacchati. Vedanañce anuseti tena sankhaṃ gacchati. Saññañce anuseti tena sankhaṃ gacchati. Sankhāre ce anuseti tena sankhaṃ gacchati. Viññāṇañce anuseti tena sankhaṃ gacchati. Rūpañce, bhante, nānuseti na tena sankhaṃ gacchati. Vedanañce … saññañce … sankhāre ce … viññāṇañce nānuseti na tena sankhaṃ gacchati. Imassa khvāhaṃ, bhante, bhagavatā sankhittena bhāsitassa evaṃ vitthārena atthaṃ ājānāmī"ti.

3 "Sādhu sādhu, bhikkhu. Sādhu kho tvaṃ, bhikkhu, mayā sankhittena bhāsitassa vitthārena atthaṃ ājānāsi. Rūpañce, bhikkhu, anuseti tena sankhaṃ gacchati. Vedanañce … saññañce … sankhāre ce … viññāṇañce anuseti tena sankhaṃ gacchati. Rūpañce, bhikkhu, nānuseti na tena sankhaṃ gacchati. Vedanañce … saññañce … sankhāre ce … viññāṇañce nānuseti na tena sankhaṃ gacchati. Imassa kho, bhikkhu, mayā sankhittena, bhāsitassa evaṃ vitthārena attho daṭṭhabbo"ti.

4 Atha kho so bhikkhu bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.

5 Atha kho so bhikkhu eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. "Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā"ti abbhaññāsi. Aññataro ca pana so bhikkhu arahataṃ ahosīti.

Tatiyaṃ.