1 Sāvatthiyaṃ. "Bhūtapubbaṃ, bhikkhave, sakkassa devānamindassa rahogatassa paṭisallīnassa evaṃ cetaso parivitakko udapādi:  ‘yopi me assa supaccatthiko tassapāhaṃ na dubbheyyan’ti. Atha kho, bhikkhave, vepacitti asurindo sakkassa devānamindassa cetasā cetoparivitakkamaññāya yena sakko devānamindo tenupasankami. Addasā kho, bhikkhave, sakko devānamindo vepacittiṃ asurindaṃ dūratova āgacchantaṃ. Disvāna vepacittiṃ asurindaṃ etadavoca:  ‘tiṭṭha, vepacitti, gahitosī’ti.

2 ‘Yadeva te, mārisa, pubbe cittaṃ, tadeva tvaṃ mā pajahāsī’ti.

3 ‘Sapassu ca me, vepacitti, adubbhāyā’ti.

4 ‘Yaṃ musā bhaṇato pāpaṃ,
Yaṃ pāpaṃ ariyūpavādino;
Mittadduno ca yaṃ pāpaṃ,
Yaṃ pāpaṃ akataññuno;
Tameva pāpaṃ phusatu,
Yo te dubbhe sujampatī’"ti.