1 Evaṃ me sutaṃ—​   ekaṃ samayaṃ bhagavā kosalesu addhānamaggappaṭipanno hoti āyasmatā nāgasamālena pacchāsamaṇena. Addasā kho āyasmā nāgasamālo antarāmagge dvidhāpathaṃ. Disvāna bhagavantaṃ etadavoca:  "ayaṃ, bhante, bhagavā pantho; iminā gacchāmā"ti. Evaṃ vutte, bhagavā āyasmantaṃ nāgasamālaṃ etadavoca:  "ayaṃ, nāgasamāla, pantho; iminā gacchāmā"ti.

2 Dutiyampi kho … pe … tatiyampi kho āyasmā nāgasamālo bhagavantaṃ etadavoca:  "ayaṃ, bhante, bhagavā pantho; iminā gacchāmā"ti. Tatiyampi kho bhagavā āyasmantaṃ nāgasamālaṃ etadavoca:  "ayaṃ, nāgasamāla, pantho; iminā gacchāmā"ti. Atha kho āyasmā nāgasamālo bhagavato pattacīvaraṃ tattheva chamāyaṃ nikkhipitvā pakkāmi:  "idaṃ, bhante, bhagavato pattacīvaran"ti.

3 Atha kho āyasmato nāgasamālassa tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ pattañca bhindiṃsu sanghāṭiñca vipphālesuṃ. Atha kho āyasmā nāgasamālo bhinnena pattena vipphālitāya sanghāṭiyā yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā nāgasamālo bhagavantaṃ etadavoca:  "idha mayhaṃ, bhante, tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ, pattañca bhindiṃsu, sanghāṭiñca vipphālesun"ti.

4 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

5 "Saddhiṃ caramekato vasaṃ,
Misso aññajanena vedagū;
Vidvā pajahāti pāpakaṃ,
Koñco khīrapakova ninnagan"ti.

Sattamaṃ.