1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā aññāsikoṇḍañño bhagavato avidūre nisinno hoti pallankaṃ ābhujitvā ujuṃ kāyaṃ paṇidhāya taṇhāsankhayavimuttiṃ paccavekkhamāno.

2 Addasā kho bhagavā āyasmantaṃ aññāsikoṇḍaññaṃ avidūre nisinnaṃ pallankaṃ ābhujitvā ujuṃ kāyaṃ paṇidhāya taṇhāsankhayavimuttiṃ paccavekkhamānaṃ.

3 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

4 "Yassa mūlaṃ chamā natthi,
paṇṇā natthi kuto latā;
Taṃ dhīraṃ bandhanā muttaṃ,
ko taṃ ninditumarahati;
Devāpi naṃ pasaṃsanti,
brahmunāpi pasaṃsito"ti.

Chaṭṭhaṃ.