Saddhamma Study Group
  • A Saddhamma Study Group translation from the Pāḷi text (coming sooner or later).

62. Udāna 7.2: The Second Discourse about Bhaddiya

1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sāriputto āyasmantaṃ lakuṇḍakabhaddiyaṃ sekhaṃ maññamāno bhiyyoso mattāya anekapariyāyena dhammiyā kathāya sandasseti samādapeti samuttejeti sampahaṃseti.

2 Addasā kho bhagavā āyasmantaṃ sāriputtaṃ āyasmantaṃ lakuṇḍakabhaddiyaṃ sekhaṃ maññamānaṃ bhiyyoso mattāya anekapariyāyena dhammiyā kathāya sandassentaṃ samādapentaṃ samuttejentaṃ sampahaṃsentaṃ.

3 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

4 "Acchecchi vaṭṭaṃ byagā nirāsaṃ,
Visukkhā saritā na sandati;
Chinnaṃ vaṭṭaṃ na vattati,
Esevanto dukkhassā"ti.

Dutiyaṃ.