1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā ānando yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca: 

2 "Yāvakīvañca, bhante, tathāgatā loke nuppajjanti arahanto sammāsambuddhā tāva aññatitthiyā paribbājakā sakkatā honti garukatā mānitā pūjitā apacitā lābhino cīvara­piṇḍapāta­senāsana­gilānapaccaya­bhesajja­parikkārānaṃ. Yato ca kho, bhante, tathāgatā loke uppajjanti arahanto sammāsambuddhā atha aññatitthiyā paribbājakā asakkatā honti agarukatā amānitā apūjitā anapacitā na lābhino cīvara­piṇḍapāta­senāsana­gilānapaccaya­bhesajja­parikkārānaṃ. Bhagavāyeva dāni, bhante, sakkato hoti garukato mānito pūjito apacito lābhī cīvara­piṇḍapāta­senāsana­gilānapaccaya­bhesajja­parikkārānaṃ, bhikkhusangho cā"ti.

3 "Evametaṃ, ānanda, yāvakīvañca, ānanda, tathāgatā loke nuppajjanti arahanto sammāsambuddhā tāva aññatitthiyā paribbājakā sakkatā honti garukatā mānitā pūjitā apacitā lābhino cīvara­piṇḍapāta­senāsana­gilānapaccaya­bhesajja­parikkārānaṃ. Yato ca kho, ānanda, tathāgatā loke uppajjanti arahanto sammāsambuddhā atha aññatitthiyā paribbājakā asakkatā honti agarukatā amānitā apūjitā anapacitā na lābhino cīvara­piṇḍapāta­senāsana­gilānapaccaya­bhesajja­parikkārānaṃ. Tathāgatova dāni sakkato hoti garukato mānito pūjito apacito lābhī cīvara­piṇḍapāta­senāsana­gilānapaccaya­bhesajja­parikkārānaṃ, bhikkhusangho cā"ti.

4 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

5 "Obhāsati tāva so kimi,
Yāva na unnamate pabhankaro;
Sa verocanamhi uggate,
Hatappabho hoti na cāpi bhāsati.

6 Evaṃ obhāsitameva takkikānaṃ,
Yāva sammāsambuddhā loke nuppajjanti;
Na takkikā sujjhanti na cāpi sāvakā,
Duddiṭṭhī na dukkhā pamuccare"ti.

Dasamaṃ.

7 Āyujaṭilavekkhaṇā,
tayo titthiyā subhūti;
Gaṇikā upāti navamo,
uppajjanti ca te dasāti.

Jaccandhavaggo chaṭṭho.