1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sāriputto bhagavato avidūre nisinno hoti pallankaṃ ābhujitvā ujuṃ kāyaṃ paṇidhāya attano upasamaṃ paccavekkhamāno.

2 Addasā kho bhagavā āyasmantaṃ sāriputtaṃ avidūre nisinnaṃ pallankaṃ ābhujitvā ujuṃ kāyaṃ paṇidhāya attano upasamaṃ paccavekkhamānaṃ.

3 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

4 "Upasantasantacittassa,
netticchinnassa bhikkhuno;
Vikkhīṇo jātisaṃsāro,
mutto so mārabandhanā"ti.

Dasamaṃ.

Meghiyavaggo catuttho.

5 Meghiyo uddhatā gopālo,
yakkho nāgena pañcamaṃ;
Piṇḍolo sāriputto ca,
sundarī bhavati aṭṭhamaṃ;
Upaseno vangantaputto,
sāriputto ca te dasāti.