1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa upāsakassa ekaputtako piyo manāpo kālankato hoti.

2 Atha kho sambahulā upāsakā allavatthā allakesā divā divassa yena bhagavā tenupasankamiṃsu; upasankamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho te upāsake bhagavā etadavoca:  "kiṃ nu kho tumhe, upāsakā, allavatthā allakesā idhūpasankamantā divā divassā"ti?

3 Evaṃ vutte, so upāsako bhagavantaṃ etadavoca:  "mayhaṃ kho, bhante, ekaputtako piyo manāpo kālankato. Tena mayaṃ allavatthā allakesā idhūpasankamantā divā divassā"ti.

4 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

5 "Piyarūpassādagadhitāse,
Devakāyā puthu manussā ca;
Aghāvino parijunnā,
Maccurājassa vasaṃ gacchanti.

6 Ye ve divā ca ratto ca,
Appamattā jahanti piyarūpaṃ;
Te ve khaṇanti aghamūlaṃ,
Maccuno āmisaṃ durativattan"ti.

Sattamaṃ.