1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sangāmaji sāvatthiṃ anuppatto hoti bhagavantaṃ dassanāya. Assosi kho āyasmato sangāmajissa purāṇadutiyikā:  "ayyo kira sangāmaji sāvatthiṃ anuppatto"ti. Sā dārakaṃ ādāya jetavanaṃ agamāsi.

2 Tena kho pana samayena āyasmā sangāmaji aññatarasmiṃ rukkhamūle divāvihāraṃ nisinno hoti. Atha kho āyasmato sangāmajissa purāṇadutiyikā yenāyasmā sangāmaji tenupasankami; upasankamitvā āyasmantaṃ sangāmajiṃ etadavoca:  "khuddaputtañhi, samaṇa, posa man"ti. Evaṃ vutte, āyasmā sangāmaji tuṇhī ahosi.

3 Dutiyampi kho āyasmato sangāmajissa purāṇadutiyikā āyasmantaṃ sangāmajiṃ etadavoca:  "khuddaputtañhi, samaṇa, posa man"ti. Dutiyampi kho āyasmā sangāmaji tuṇhī ahosi.

4 Tatiyampi kho āyasmato sangāmajissa purāṇadutiyikā āyasmantaṃ sangāmajiṃ etadavoca:  "khuddaputtañhi, samaṇa, posa man"ti. Tatiyampi kho āyasmā sangāmaji tuṇhī ahosi.

5 Atha kho āyasmato sangāmajissa purāṇadutiyikā taṃ dārakaṃ āyasmato sangāmajissa purato nikkhipitvā pakkāmi:  "eso te, samaṇa, putto; posa nan"ti.

6 Atha kho āyasmā sangāmaji taṃ dārakaṃ neva olokesi nāpi ālapi. Atha kho āyasmato sangāmajissa purāṇadutiyikā avidūraṃ gantvā apalokentī addasa āyasmantaṃ sangāmajiṃ taṃ dārakaṃ neva olokentaṃ nāpi ālapantaṃ, disvānassā etadahosi:  "na cāyaṃ samaṇo puttenapi atthiko"ti. Tato paṭinivattitvā dārakaṃ ādāya pakkāmi. Addasā kho bhagavā dibbena cakkhunā visuddhena atikkantamānusakena āyasmato sangāmajissa purāṇadutiyikāya evarūpaṃ vippakāraṃ.

7 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

8 "Āyantiṃ nābhinandati,
pakkamantiṃ na socati;
Sangā sangāmajiṃ muttaṃ,
tamahaṃ brūmi brāhmaṇan"ti.

Aṭṭhamaṃ.