Aññataratherīgāthā

67 "Paṇṇavīsativassāni,
yato pabbajitā ahaṃ;
Nāccharāsanghātamattampi,
cittassūpasamajjhagaṃ.

68 Aladdhā cetaso santiṃ,
kāmarāgenavassutā;
Bāhā paggayha kandantī,
vihāraṃ pāvisiṃ ahaṃ.

69 Sā bhikkhuniṃ upāgacchiṃ,
yā me saddhāyikā ahu;
Sā me dhammamadesesi,
khandhāyatanadhātuyo.

70 Tassā dhammaṃ suṇitvāna,
ekamante upāvisiṃ;
Pubbenivāsaṃ jānāmi,
dibbacakkhu visodhitaṃ.

71 Cetopariccañāṇañca,
sotadhātu visodhitā;
Iddhīpi me sacchikatā,
patto me āsavakkhayo;
Chaḷabhiññā sacchikatā,
kataṃ buddhassa sāsanan"ti.

Vimalātherīgāthā

72 "Mattā vaṇṇena rūpena,
sobhaggena yasena ca;
Yobbanena cupatthaddhā,
aññāsamatimaññihaṃ.

73 Vibhūsetvā imaṃ kāyaṃ,
sucittaṃ bālalāpanaṃ;
Aṭṭhāsiṃ vesidvāramhi,
luddo pāsamivoḍḍiya.

74 Piḷandhanaṃ vidaṃsentī,
guyhaṃ pakāsikaṃ bahuṃ;
Akāsiṃ vividhaṃ māyaṃ,
ujjagghantī bahuṃ janaṃ.

75 Sājja piṇḍaṃ caritvāna,
muṇḍā sanghāṭipārutā;
Nisinnā rukkhamūlamhi,
avitakkassa lābhinī.

76 Sabbe yogā samucchinnā,
ye dibbā ye ca mānusā;
Khepetvā āsave sabbe,
sītibhūtāmhi nibbutā"ti.

Sīhātherīgāthā

77 "Ayoniso manasikārā,
kāmarāgena aṭṭitā;
Ahosiṃ uddhatā pubbe,
citte avasavattinī.

78 Pariyuṭṭhitā klesehi,
subhasaññānuvattinī;
Samaṃ cittassa na labhiṃ,
rāgacittavasānugā.

79 Kisā paṇḍu vivaṇṇā ca,
satta vassāni cārihaṃ;
Nāhaṃ divā vā rattiṃ vā,
sukhaṃ vindiṃ sudukkhitā.

80 Tato rajjuṃ gahetvāna,
pāvisiṃ vanamantaraṃ;
Varaṃ me idha ubbandhaṃ,
yañca hīnaṃ punācare.

81 Daḷhapāsaṃ karitvāna,
rukkhasākhāya bandhiya;
Pakkhipiṃ pāsaṃ gīvāyaṃ,
atha cittaṃ vimucci me"ti.

Sundarīnandā

82 "Āturaṃ asuciṃ pūtiṃ,
passa nande samussayaṃ;
Asubhāya cittaṃ bhāvehi,
ekaggaṃ susamāhitaṃ.

83 Yathā idaṃ tathā etaṃ,
yathā etaṃ tathā idaṃ;
Duggandhaṃ pūtikaṃ vāti,
bālānaṃ abhinanditaṃ.

84 Evametaṃ avekkhantī,
rattindivamatanditā;
Tato sakāya paññāya,
abhinibbijjha dakkhisaṃ".

85 "Tassā me appamattāya,
vicinantiyā yoniso;
Yathābhūtaṃ ayaṃ kāyo,
diṭṭho santarabāhiro.

86 Atha nibbindahaṃ kāye,
ajjhattañca virajjahaṃ;
Appamattā visaṃyuttā,
upasantāmhi nibbutā"ti.

Nanduttarātherīgāthā

87 "Aggiṃ candañca sūriyañca,
devatā ca namassihaṃ;
Nadītitthāni gantvāna,
udakaṃ oruhāmihaṃ.

88 Bahūvatasamādānā,
aḍḍhaṃ sīsassa olikhiṃ;
Chamāya seyyaṃ kappemi,
rattiṃ bhattaṃ na bhuñjahaṃ.

89 Vibhūsāmaṇḍanaratā,
nhāpanucchādanehi ca;
Upakāsiṃ imaṃ kāyaṃ,
kāmarāgena aṭṭitā.

90 Tato saddhaṃ labhitvāna,
pabbajiṃ anagāriyaṃ;
Disvā kāyaṃ yathābhūtaṃ,
kāmarāgo samūhato.

91 Sabbe bhavā samucchinnā,
icchā ca patthanāpi ca;
Sabbayogavisaṃyuttā,
santiṃ pāpuṇi cetaso"ti.

6 Mittākāḷītherīgāthā

92 "Saddhāya pabbajitvāna,
agārasmānagāriyaṃ;
Vicariṃhaṃ tena tena,
lābhasakkāraussukā.

93 Riñcitvā paramaṃ atthaṃ,
hīnamatthaṃ asevihaṃ;
Kilesānaṃ vasaṃ gantvā,
sāmaññatthaṃ na bujjhihaṃ.

94 Tassā me ahu saṃvego,
nisinnāya vihārake;
Ummaggapaṭipannāmhi,
taṇhāya vasamāgatā.

95 Appakaṃ jīvitaṃ mayhaṃ,
jarā byādhi ca maddati;
Purāyaṃ bhijjati kāyo,
na me kālo pamajjituṃ.

96 Yathābhūtamavekkhantī,
khandhānaṃ udayabbayaṃ;
Vimuttacittā uṭṭhāsiṃ,
kataṃ buddhassa sāsanan"ti.

Sakulātherīgāthā

97 "Agārasmiṃ vasantīhaṃ,
dhammaṃ sutvāna bhikkhuno;
Addasaṃ virajaṃ dhammaṃ,
nibbānaṃ padamaccutaṃ.

98 Sāhaṃ puttaṃ dhītarañca,
dhanadhaññañca chaḍḍiya;
Kese chedāpayitvāna,
pabbajiṃ anagāriyaṃ.

99 Sikkhamānā ahaṃ santī,
bhāventī maggamañjasaṃ;
Pahāsiṃ rāgadosañca,
tadekaṭṭhe ca āsave.

100 Bhikkhunī upasampajja,
pubbajātimanussariṃ;
Dibbacakkhu visodhitaṃ,
vimalaṃ sādhubhāvitaṃ.

101 Sankhāre parato disvā,
hetujāte palokite;
Pahāsiṃ āsave sabbe,
sītibhūtāmhi nibbutā"ti.

Soṇātherīgāthā

102 "Dasa putte vijāyitvā,
asmiṃ rūpasamussaye;
Tatohaṃ dubbalā jiṇṇā,
bhikkhuniṃ upasankamiṃ.

103 Sā me dhammamadesesi,
khandhāyatanadhātuyo;
Tassā dhammaṃ suṇitvāna,
kese chetvāna pabbajiṃ.

104 Tassā me sikkhamānāya,
dibbacakkhu visodhitaṃ;
Pubbenivāsaṃ jānāmi,
yattha me vusitaṃ pure.

105 Animittañca bhāvemi,
ekaggā susamāhitā;
Anantarāvimokkhāsiṃ,
anupādāya nibbutā.

106 Pañcakkhandhā pariññātā,
tiṭṭhanti chinnamūlakā;
Dhi tavatthu jare jamme,
natthi dāni punabbhavo"ti.

Bhaddākuṇḍalakesātherīgāthā

107 "Lūnakesī pankadharī,
ekasāṭī pure cariṃ;
Avajje vajjamatinī,
vajje cāvajjadassinī.

108 Divāvihārā nikkhamma,
gijjhakūṭamhi pabbate;
Addasaṃ virajaṃ buddhaṃ,
bhikkhusaṃghapurakkhataṃ.

109 Nihacca jāṇuṃ vanditvā,
sammukhā añjaliṃ akaṃ;
‘Ehi bhadde’ti maṃ avaca,
sā me āsūpasampadā.

110 Ciṇṇā angā ca magadhā,
vajjī kāsī ca kosalā;
Anaṇā paṇṇāsa vassāni,
raṭṭhapiṇḍaṃ abhuñjahaṃ.

111 Puññaṃ vata pasavi bahuṃ,
Sappañño vatāyaṃ upāsako;
Yo bhaddāya cīvaraṃ adāsi,
Vippamuttāya sabbaganthehī"ti.

Paṭācārātherīgāthā

112 "Nangalehi kasaṃ khettaṃ,
bījāni pavapaṃ chamā;
Puttadārāni posentā,
dhanaṃ vindanti māṇavā.

113 Kimahaṃ sīlasampannā,
satthusāsanakārikā;
Nibbānaṃ nādhigacchāmi,
akusītā anuddhatā.

114 Pāde pakkhālayitvāna,
udakesu karomahaṃ;
Pādodakañca disvāna,
thalato ninnamāgataṃ.

115 Tato cittaṃ samādhesiṃ,
assaṃ bhadraṃvajāniyaṃ;
Tato dīpaṃ gahetvāna,
vihāraṃ pāvisiṃ ahaṃ;
Seyyaṃ olokayitvāna,
mañcakamhi upāvisiṃ.

116 Tato sūciṃ gahetvāna,
vaṭṭiṃ okassayāmahaṃ;
Padīpasseva nibbānaṃ,
vimokkho ahu cetaso"ti.

Tiṃsamattātherīgāthā

117 "Musalāni gahetvāna,
dhaññaṃ koṭṭenti māṇavā;
Puttadārāni posentā,
dhanaṃ vindanti māṇavā.

118 Karotha buddhasāsanaṃ,
yaṃ katvā nānutappati;
Khippaṃ pādāni dhovitvā,
ekamante nisīdatha;
Cetosamathamanuyuttā,
karotha buddhasāsanaṃ".

119 Tassā tā vacanaṃ sutvā,
paṭācārāya sāsanaṃ;
Pāde pakkhālayitvāna,
ekamantaṃ upāvisuṃ;
Cetosamathamanuyuttā,
akaṃsu buddhasāsanaṃ.

120 Rattiyā purime yāme,
pubbajātimanussaruṃ;
Rattiyā majjhime yāme,
dibbacakkhuṃ visodhayuṃ;
Rattiyā pacchime yāme,
tamokhandhaṃ padālayuṃ.

121 Uṭṭhāya pāde vandiṃsu,
"katā te anusāsanī;
Indaṃva devā tidasā,
sangāme aparājitaṃ;
Purakkhatvā vihassāma,
tevijjāmha anāsavā"ti.

Candātherīgāthā

122 "Duggatāhaṃ pure āsiṃ,
vidhavā ca aputtikā;
Vinā mittehi ñātīhi,
bhattacoḷassa nādhigaṃ.

123 Pattaṃ daṇḍañca gaṇhitvā,
bhikkhamānā kulā kulaṃ;
Sītuṇhena ca ḍayhantī,
satta vassāni cārihaṃ.

124 Bhikkhuniṃ puna disvāna,
annapānassa lābhiniṃ;
Upasankamma avocaṃ,
‘pabbajjaṃ anagāriyaṃ’.

125 Sā ca maṃ anukampāya,
pabbājesi paṭācārā;
Tato maṃ ovaditvāna,
paramatthe niyojayi.

126 Tassāhaṃ vacanaṃ sutvā,
akāsiṃ anusāsaniṃ;
Amogho ayyāyovādo,
tevijjāmhi anāsavā"ti.