Puṇṇakamāṇavapucchā

(iccāyasmā puṇṇako):

1043 "Anejaṃ mūladassāviṃ,
Atthi pañhena āgamaṃ;
Kiṃ nissitā isayo manujā,
Khattiyā brāhmaṇā devatānaṃ;
Yaññamakappayiṃsu puthūdha loke,
Pucchāmi taṃ bhagavā brūhi me taṃ".

(puṇṇakāti bhagavā):
1044 "Ye kecime isayo manujā,
Khattiyā brāhmaṇā devatānaṃ;
Yaññamakappayiṃsu puthūdha loke,
Āsīsamānā puṇṇaka itthattaṃ;
Jaraṃ sitā yaññamakappayiṃsu".

(iccāyasmā puṇṇako):
1045 "Ye kecime isayo manujā,
Khattiyā brāhmaṇā devatānaṃ;
Yaññamakappayiṃsu puthūdha loke,
Kaccissu te bhagavā yaññapathe appamattā;
Atāruṃ jātiñca jarañca mārisa,
Pucchāmi taṃ bhagavā brūhi metaṃ".

(puṇṇakāti bhagavā):
1046 "Āsīsanti thomayanti abhijappanti juhanti,
Kāmābhijappanti paṭicca lābhaṃ;
Te yājayogā bhavarāgarattā,
Nātariṃsu jātijaranti brūmi".

(iccāyasmā puṇṇako):
1047 "Te ce nātariṃsu yājayogā,
Yaññehi jātiñca jarañca mārisa;
Atha ko carahi devamanussaloke,
Atāri jātiñca jarañca mārisa;
Pucchāmi taṃ bhagavā brūhi me taṃ".

(puṇṇakāti bhagavā):
1048 "Sankhāya lokasmi paroparāni,
Yassiñjitaṃ natthi kuhiñci loke;
Santo vidhūmo anīgho nirāso,
Atāri so jātijaranti brūmī"ti.

Puṇṇakamāṇavapucchā tatiyā.