Jatukaṇṇimāṇavapucchā

(iccāyasmā jatukaṇṇi):

1096 "Sutvānahaṃ vīramakāmakāmiṃ,
Oghātigaṃ puṭṭhumakāmamāgamaṃ;
Santipadaṃ brūhi sahajanetta,
Yathātacchaṃ bhagavā brūhi metaṃ.

1097 Bhagavā hi kāme abhibhuyya iriyati,
Ādiccova pathaviṃ tejī tejasā;
Parittapaññassa me bhūripañña,
Ācikkha dhammaṃ yamahaṃ vijaññaṃ;
Jātijarāya idha vippahānaṃ".

(jatukaṇṇīti bhagavā):
1098 "Kāmesu vinaya gedhaṃ,
Nekkhammaṃ daṭṭhu khemato;
Uggahītaṃ nirattaṃ vā,
Mā te vijjittha kiñcanaṃ.

1099 Yaṃ pubbe taṃ visosehi,
pacchā te māhu kiñcanaṃ;
Majjhe ce no gahessasi,
upasanto carissasi.

1100 Sabbaso nāmarūpasmiṃ,
Vītagedhassa brāhmaṇa;
Āsavāssa na vijjanti,
Yehi maccuvasaṃ vaje"ti.

Jatukaṇṇimāṇavapucchā ekādasamā.