Māgaṇḍiyasutta

835 "Disvāna taṇhaṃ aratiṃ ragañca,
Nāhosi chando api methunasmiṃ;
Kimevidaṃ muttakarīsapuṇṇaṃ,
Pādāpi naṃ samphusituṃ na icche".

836 "Etādisañce ratanaṃ na icchasi,
Nāriṃ narindehi bahūhi patthitaṃ;
Diṭṭhigataṃ sīlavataṃ nu jīvitaṃ,
Bhavūpapattiñca vadesi kīdisaṃ".

(māgaṇḍiyāti bhagavā):
837 "Idaṃ vadāmīti na tassa hoti,
Dhammesu niccheyya samuggahītaṃ;
Passañca diṭṭhīsu anuggahāya,
Ajjhattasantiṃ pacinaṃ adassaṃ".

(iti māgaṇḍiyo):
838 "Vinicchayā yāni pakappitāni,
Te ve munī brūsi anuggahāya;
Ajjhattasantīti yametamatthaṃ,
Kathaṃ nu dhīrehi paveditaṃ taṃ".

(māgaṇḍiyāti bhagavā):
839 "Na diṭṭhiyā na sutiyā na ñāṇena,
Sīlabbatenāpi na suddhimāha;
Adiṭṭhiyā assutiyā añāṇā,
Asīlatā abbatā nopi tena;
Ete ca nissajja anuggahāya,
Santo anissāya bhavaṃ na jappe".

(iti māgaṇḍiyo):
840 "No ce kira diṭṭhiyā na sutiyā na ñāṇena,
Sīlabbatenāpi na suddhimāha;
Adiṭṭhiyā assutiyā añāṇā,
Asīlatā abbatā nopi tena;
Maññāmahaṃ momuhameva dhammaṃ,
Diṭṭhiyā eke paccenti suddhiṃ".

(māgaṇḍiyāti bhagavā):
841 "Diṭṭhañca nissāya anupucchamāno,
Samuggahītesu pamohamāgā;
Ito ca nāddakkhi aṇumpi saññaṃ,
Tasmā tuvaṃ momuhato dahāsi.

842 Samo visesī uda vā nihīno,
Yo maññati so vivadetha tena;
Tīsu vidhāsu avikampamāno,
Samo visesīti na tassa hoti.

843 Saccanti so brāhmaṇo kiṃ vadeyya,
Musāti vā so vivadetha kena;
Yasmiṃ samaṃ visamaṃ vāpi natthi,
Sa kena vādaṃ paṭisaṃyujeyya.

844 Okaṃ pahāya aniketasārī,
Gāme akubbaṃ muni santhavāni;
Kāmehi ritto apurakkharāno,
Kathaṃ na viggayha janena kayirā.

845 Yehi vivitto vicareyya loke,
Na tāni uggayha vadeyya nāgo;
Jalambujaṃ kaṇḍakavārijaṃ yathā,
Jalena pankena canūpalittaṃ;
Evaṃ munī santivādo agiddho,
Kāme ca loke ca anūpalitto.

846 Na vedagū diṭṭhiyāyako na mutiyā,
Sa mānameti na hi tammayo so;
Na kammunā nopi sutena neyyo,
Anūpanīto sa nivesanesu.

847 Saññāvirattassa na santi ganthā,
Paññāvimuttassa na santi mohā;
Saññañca diṭṭhiñca ye aggahesuṃ,
Te ghaṭṭayantā vicaranti loke"ti.

Māgaṇḍiyasuttaṃ navamaṃ.