Tissametteyyasutta

(iccāyasmā tisso metteyyo):
814 "Methunamanuyuttassa,
Vighātaṃ brūhi mārisa;
Sutvāna tava sāsanaṃ,
Viveke sikkhissāmase".

(metteyyāti bhagavā):
815 "Methunamanuyuttassa,
Mussate vāpi sāsanaṃ;
Micchā ca paṭipajjati,
Etaṃ tasmiṃ anāriyaṃ.

816 Eko pubbe caritvāna,
methunaṃ yo nisevati;
Yānaṃ bhantaṃva taṃ loke,
hīnamāhu puthujjanaṃ.

817 Yaso kitti ca yā pubbe,
hāyate vāpi tassa sā;
Etampi disvā sikkhetha,
methunaṃ vippahātave.

818 Sankappehi pareto so,
kapaṇo viya jhāyati;
Sutvā paresaṃ nigghosaṃ,
manku hoti tathāvidho.

819 Atha satthāni kurute,
paravādehi codito;
Esa khvassa mahāgedho,
mosavajjaṃ pagāhati.

820 Paṇḍitoti samaññāto,
ekacariyaṃ adhiṭṭhito;
Athāpi methune yutto,
mandova parikissati.

821 Etamādīnavaṃ ñatvā,
Muni pubbāpare idha;
Ekacariyaṃ daḷhaṃ kayirā,
Na nisevetha methunaṃ.

822 Vivekaññeva sikkhetha,
etaṃ ariyānamuttamaṃ;
Na tena seṭṭho maññetha,
sa ve nibbānasantike.

823 Rittassa munino carato,
Kāmesu anapekkhino;
Oghatiṇṇassa pihayanti,
Kāmesu gadhitā pajā"ti.

Tissametteyyasuttaṃ sattamaṃ.