2:6 Kapilasutta (dhammacariyasutta)

274 Dhammacariyaṃ brahmacariyaṃ,
Etadāhu vasuttamaṃ;
Pabbajitopi ce hoti,
Agārā anagāriyaṃ.

275 So ce mukharajātiko,
vihesābhirato mago;
Jīvitaṃ tassa pāpiyo,
rajaṃ vaḍḍheti attano.

276 Kalahābhirato bhikkhu,
Mohadhammena āvuto;
Akkhātampi na jānāti,
Dhammaṃ buddhena desitaṃ.

277 Vihesaṃ bhāvitattānaṃ,
avijjāya purakkhato;
Sankilesaṃ na jānāti,
maggaṃ nirayagāminaṃ.

278 Vinipātaṃ samāpanno,
gabbhā gabbhaṃ tamā tamaṃ;
Sa ve tādisako bhikkhu,
pecca dukkhaṃ nigacchati.

279 Gūthakūpo yathā assa,
sampuṇṇo gaṇavassiko;
Yo ca evarūpo assa,
dubbisodho hi sāngaṇo.

280 Yaṃ evarūpaṃ jānātha,
bhikkhavo gehanissitaṃ;
Pāpicchaṃ pāpasankappaṃ,
pāpaācāragocaraṃ.

281 Sabbe samaggā hutvāna,
abhinibbajjiyātha naṃ;
Kāraṇḍavaṃ niddhamatha,
kasambuṃ apakassatha.

282 Tato palāpe vāhetha,
Assamaṇe samaṇamānine;
Niddhamitvāna pāpicche,
Pāpaācāragocare.

283 Suddhā suddhehi saṃvāsaṃ,
Kappayavho patissatā;
Tato samaggā nipakā,
Dukkhassantaṃ karissathāti.

Dhammacariyasuttaṃ chaṭṭhaṃ.