Mangalasutta

Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasankami; upasankamitvā bhagavantaṃ abhivādetvā ekamantaṃ aṭṭhāsi.

Ekamantaṃ ṭhitā kho sā devatā bhagavantaṃ gāthāya ajjhabhāsi: 

---

258 "Bahū devā manussā ca,
mangalāni acintayuṃ;
Ākankhamānā sotthānaṃ,
brūhi mangalamuttamaṃ".

259 "Asevanā ca bālānaṃ,
paṇḍitānañca sevanā;
Pūjā ca pūjaneyyānaṃ,
etaṃ mangalamuttamaṃ.

260 Patirūpadesavāso ca,
pubbe ca katapuññatā;
Attasammāpaṇidhi ca,
etaṃ mangalamuttamaṃ.

261 Bāhusaccañca sippañca,
vinayo ca susikkhito;
Subhāsitā ca yā vācā,
etaṃ mangalamuttamaṃ.

262 Mātāpitu upaṭṭhānaṃ,
puttadārassa sangaho;
Anākulā ca kammantā,
etaṃ mangalamuttamaṃ.

---

263 Dānañca dhammacariyā ca,
ñātakānañca sangaho;
Anavajjāni kammāni,
etaṃ mangalamuttamaṃ.

264 Āratī viratī pāpā,
majjapānā ca saṃyamo;
Appamādo ca dhammesu,
etaṃ mangalamuttamaṃ.

265 Gāravo ca nivāto ca,
santuṭṭhi ca kataññutā;
Kālena dhammassavanaṃ,
etaṃ mangalamuttamaṃ.

266 Khantī ca sovacassatā,
samaṇānañca dassanaṃ;
Kālena dhammasākacchā,
etaṃ mangalamuttamaṃ.

267 Tapo ca brahmacariyañca,
Ariyasaccāna dassanaṃ;
Nibbānasacchikiriyā ca,
Etaṃ mangalamuttamaṃ.

268 Phuṭṭhassa lokadhammehi,
Cittaṃ yassa na kampati;
Asokaṃ virajaṃ khemaṃ,
Etaṃ mangalamuttamaṃ.

269 Etādisāni katvāna,
Sabbattha maparājitā;
Sabbattha sotthiṃ gacchanti,
Taṃ tesaṃ mangalamuttaman"ti.

Mangalasuttaṃ catutthaṃ.