Hemavatasutta

(iti sātāgiro yakkho):

153 "Ajja pannaraso uposatho,
Dibbā ratti upaṭṭhitā;
Anomanāmaṃ satthāraṃ,
Handa passāma gotamaṃ".

(iti hemavato yakkho):
154 "Kacci mano supaṇihito,
Sabbabhūtesu tādino;
Kacci iṭṭhe aniṭṭhe ca,
Sankappassa vasīkatā".

(iti sātāgiro yakkho):
155 "Mano cassa supaṇihito,
Sabbabhūtesu tādino;
Atho iṭṭhe aniṭṭhe ca,
Sankappassa vasīkatā".

(iti hemavato yakkho):
156 "Kacci adinnaṃ nādiyati,
Kacci pāṇesu saññato;
Kacci ārā pamādamhā,
Kacci jhānaṃ na riñcati".

(iti sātāgiro yakkho):
157 "Na so adinnaṃ ādiyati,
Atho pāṇesu saññato;
Atho ārā pamādamhā,
Buddho jhānaṃ na riñcati".

---

(iti hemavato yakkho):
158 "Kacci musā na bhaṇati,
Kacci na khīṇabyappatho;
Kacci vebhūtiyaṃ nāha,
Kacci samphaṃ na bhāsati".

(iti sātāgiro yakkho):
159 "Musā ca so na bhaṇati,
Atho na khīṇabyappatho;
Atho vebhūtiyaṃ nāha,
Mantā atthañca bhāsati".

(iti hemavato yakkho):
160 "Kacci na rajjati kāmesu,
Kacci cittaṃ anāvilaṃ;
Kacci mohaṃ atikkanto,
Kacci dhammesu cakkhumā".

(iti sātāgiro yakkho):
161 "Na so rajjati kāmesu,
Atho cittaṃ anāvilaṃ;
Sabbamohaṃ atikkanto,
Buddho dhammesu cakkhumā".

(iti hemavato yakkho):
162 "Kacci vijjāya sampanno,
Kacci saṃsuddhacāraṇo;
Kaccissa āsavā khīṇā,
Kacci natthi punabbhavo".

(iti sātāgiro yakkho):
163 "Vijjāya ceva sampanno,
Atho saṃsuddhacāraṇo;
Sabbassa āsavā khīṇā,
Natthi tassa punabbhavo".

---

163A"> "Sampannaṃ munino cittaṃ,
Kammunā byappathena ca;
Vijjācaraṇasampannaṃ,
Dhammato naṃ pasaṃsati".

163B"> "Sampannaṃ munino cittaṃ,
Kammunā byappathena ca;
Vijjācaraṇasampannaṃ,
Dhammato anumodasi.

164 Sampannaṃ munino cittaṃ,
Kammunā byappathena ca;
Vijjācaraṇasampannaṃ,
Handa passāma gotamaṃ".

165 "Eṇijanghaṃ kisaṃ vīraṃ,
Appāhāraṃ alolupaṃ;
Muniṃ vanasmiṃ jhāyantaṃ,
Ehi passāma gotamaṃ.

---

166 Sīhaṃvekacaraṃ nāgaṃ,
Kāmesu anapekkhinaṃ;
Upasankamma pucchāma,
Maccupāsappamocanaṃ.

167 Akkhātāraṃ pavattāraṃ,
Sabbadhammāna pāraguṃ;
Buddhaṃ verabhayātītaṃ,
Mayaṃ pucchāma gotamaṃ".

(iti hemavato yakkho):
168 "Kismiṃ loko samuppanno,
Kismiṃ kubbati santhavaṃ;
Kissa loko upādāya,
Kismiṃ loko vihaññati".

(hemavatāti bhagavā):
169 "Chasu loko samuppanno,
Chasu kubbati santhavaṃ;
Channameva upādāya,
Chasu loko vihaññati".

170 "Katamaṃ taṃ upādānaṃ,
Yattha loko vihaññati;
Niyyānaṃ pucchito brūhi,
Kathaṃ dukkhā pamuccati".

171 "Pañca kāmaguṇā loke,
Manochaṭṭhā paveditā;
Ettha chandaṃ virājetvā,
Evaṃ dukkhā pamuccati.

172 Etaṃ lokassa niyyānaṃ,
Akkhātaṃ vo yathātathaṃ;
Etaṃ vo ahamakkhāmi,
Evaṃ dukkhā pamuccati".

---

173 "Ko sūdha tarati oghaṃ,
Kodha tarati aṇṇavaṃ;
Appatiṭṭhe anālambe,
Ko gambhīre na sīdati".

174 "Sabbadā sīlasampanno,
Paññavā susamāhito;
Ajjhattacintī satimā,
Oghaṃ tarati duttaraṃ.

175 Virato kāmasaññāya,
Sabbasaṃyojanātigo;
Nandībhavaparikkhīṇo,
So gambhīre na sīdati".

176 "Gambhīrapaññaṃ nipuṇatthadassiṃ,
Akiñcanaṃ kāmabhave asattaṃ;
Taṃ passatha sabbadhi vippamuttaṃ,
Dibbe pathe kamamānaṃ mahesiṃ.

177 Anomanāmaṃ nipuṇatthadassiṃ,
Paññādadaṃ kāmālaye asattaṃ;
Taṃ passatha sabbaviduṃ sumedhaṃ,
Ariye pathe kamamānaṃ mahesiṃ.

178 Sudiṭṭhaṃ vata no ajja,
Suppabhātaṃ suhuṭṭhitaṃ;
Yaṃ addasāma sambuddhaṃ,
Oghatiṇṇamanāsavaṃ.

179 Ime dasasatā yakkhā,
Iddhimanto yasassino;
Sabbe taṃ saraṇaṃ yanti,
Tvaṃ no satthā anuttaro.

180 Te mayaṃ vicarissāma,
Gāmā gāmaṃ nagā nagaṃ;
Namassamānā sambuddhaṃ,
Dhammassa ca sudhammatan"ti.

Hemavatasuttaṃ navamaṃ.