Dhaniyasutta

(iti dhaniyo gopo):

18 "Pakkodano duddhakhīrohamasmi,
Anutīre mahiyā samānavāso;
Channā kuṭi āhito gini,
Atha ce patthayasī pavassa deva".

(iti bhagavā):
19 "Akkodhano vigatakhilohamasmi,
Anutīre mahiyekarattivāso;
Vivaṭā kuṭi nibbuto gini,
Atha ce patthayasī pavassa deva".

(iti dhaniyo gopo):
20 "Andhakamakasā na vijjare,
Kacche rūḷha"file:/ddr/buppo/buddhaswords/snp/snp1.2.html":114.1-114.15: error: Unclosed element “div”. tiṇe caranti gāvo;
Vuṭṭhimpi saheyyumāgataṃ,
Atha ce patthayasī pavassa deva".

(iti bhagavā):
21 "Baddhāsi bhisī susankhatā,
Tiṇṇo pāragato vineyya oghaṃ;
Attho bhisiyā na vijjati,
Atha ce patthayasī pavassa deva".

(iti dhaniyo gopo):
22 "Gopī mama assavā alolā,
Dīgharattaṃ saṃvāsiyā manāpā;
Tassā na suṇāmi kiñci pāpaṃ,
Atha ce patthayasī pavassa deva".

(iti bhagavā):
23 "Cittaṃ mama assavaṃ vimuttaṃ,
Dīgharattaṃ paribhāvitaṃ sudantaṃ;
Pāpaṃ pana me na vijjati,
Atha ce patthayasī pavassa deva".

(iti dhaniyo gopo):
24 "Attavetanabhatohamasmi,
Puttā ca me samāniyā arogā;
Tesaṃ na suṇāmi kiñci pāpaṃ,
Atha ce patthayasī pavassa deva".

(iti bhagavā):
25 "Nāhaṃ bhatakosmi kassaci,
Nibbiṭṭhena carāmi sabbaloke;
Attho bhatiyā na vijjati,
Atha ce patthayasī pavassa deva".

(iti dhaniyo gopo):
26 "Atthi vasā atthi dhenupā,
Godharaṇiyo paveṇiyopi atthi;
Usabhopi gavampatīdha atthi,
Atha ce patthayasī pavassa deva".

(iti bhagavā):
27 "Natthi vasā natthi dhenupā,
Godharaṇiyo paveṇiyopi natthi;
Usabhopi gavampatīdha natthi,
Atha ce patthayasī pavassa deva".

(iti dhaniyo gopo):
28 "Khilā nikhātā asampavedhī,
Dāmā muñjamayā navā susaṇṭhānā;
Na hi sakkhinti dhenupāpi chettuṃ,
Atha ce patthayasī pavassa deva".

(iti bhagavā):
29 "Usabhoriva chetva bandhanāni,
Nāgo pūtilataṃva dālayitvā;
Nāhaṃ punupessaṃ gabbhaseyyaṃ,
Atha ce patthayasī pavassa deva".

30 Ninnañca thalañca pūrayanto,
Mahāmegho pavassi tāvadeva;
Sutvā devassa vassato,
Imamatthaṃ dhaniyo abhāsatha.

31 "Lābhā vata no anappakā,
Ye mayaṃ bhagavantaṃ addasāma;
Saraṇaṃ taṃ upema cakkhuma,
Satthā no hohi tuvaṃ mahāmuni.

32 Gopī ca ahañca assavā,
Brahmacariyaṃ sugate carāmase;
Jātimaraṇassa pāragū,
Dukkhassantakarā bhavāmase".

(iti māro pāpimā):
33 "Nandati puttehi puttimā,
Gomā gohi tatheva nandati;
Upadhī hi narassa nandanā,
Na hi so nandati yo nirūpadhi".

(iti bhagavā):
34 "Socati puttehi puttimā,
Gomā gohi tatheva socati;
Upadhī hi narassa socanā,
Na hi so socati yo nirūpadhī"ti.

Dhaniyasuttaṃ dutiyaṃ.