Vijayasutta

193 Caraṃ vā yadi vā tiṭṭhaṃ,
nisinno uda vā sayaṃ;
Samiñjeti pasāreti,
esā kāyassa iñjanā.

194 Aṭṭhinahārusaṃyutto,
tacamaṃsāvalepano;
Chaviyā kāyo paṭicchanno,
yathābhūtaṃ na dissati.

195 Antapūro udarapūro,
yakanapeḷassa vatthino;
Hadayassa papphāsassa,
vakkassa pihakassa ca.

196 Singhāṇikāya kheḷassa,
sedassa ca medassa ca;
Lohitassa lasikāya,
pittassa ca vasāya ca.

---

197 Athassa navahi sotehi,
asucī savati sabbadā;
Akkhimhā akkhigūthako,
kaṇṇamhā kaṇṇagūthako.

198 Singhāṇikā ca nāsato,
mukhena vamatekadā;
Pittaṃ semhañca vamati,
kāyamhā sedajallikā.

199 Athassa susiraṃ sīsaṃ,
matthalungassa pūritaṃ;
Subhato naṃ maññati bālo,
avijjāya purakkhato.

200 Yadā ca so mato seti,
Uddhumāto vinīlako;
Apaviddho susānasmiṃ,
Anapekkhā honti ñātayo.

201 Khādanti naṃ suvānā ca,
singālā ca vakā kimī;
Kākā gijjhā ca khādanti,
ye caññe santi pāṇino.

202 Sutvāna buddhavacanaṃ,
Bhikkhu paññāṇavā idha;
So kho naṃ parijānāti,
Yathābhūtañhi passati.

---

203 Yathā idaṃ tathā etaṃ,
Yathā etaṃ tathā idaṃ;
Ajjhattañca bahiddhā ca,
Kāye chandaṃ virājaye.

204 Chandarāgaviratto so,
Bhikkhu paññāṇavā idha;
Ajjhagā amataṃ santiṃ,
Nibbānaṃ padamaccutaṃ.

205 Dvipādakoyaṃ asuci,
Duggandho parihīrati;
Nānākuṇapaparipūro,
Vissavanto tato tato.

206 Etādisena kāyena,
Yo maññe uṇṇametave;
Paraṃ vā avajāneyya,
Kimaññatra adassanāti.

Vijayasuttaṃ ekādasamaṃ.