1 Ekaṃ samayaṃ aññataro bhikkhu kosalesu viharati aññatarasmiṃ vanasaṇḍe. Tena kho pana samayena so bhikkhu aññatarasmiṃ kule ativelaṃ ajjhogāḷhappatto viharati. Atha kho yā tasmiṃ vanasaṇḍe adhivatthā devatā tassa bhikkhuno anukampikā atthakāmā taṃ bhikkhuṃ saṃvejetukāmā yā tasmiṃ kule kulagharaṇī, tassā vaṇṇaṃ abhinimminitvā yena so bhikkhu tenupasankami; upasankamitvā taṃ bhikkhuṃ gāthāya ajjhabhāsi: 

2 "Nadītīresu saṇṭhāne,
sabhāsu rathiyāsu ca;
Janā sangamma mantenti,
mañca tañca kimantaran"ti.

3 "Bahūhi saddā paccūhā,
khamitabbā tapassinā;
Na tena manku hotabbaṃ,
na hi tena kilissati.

4 Yo ca saddaparittāsī,
vane vātamigo yathā;
Lahucittoti taṃ āhu,
nāssa sampajjate vatan"ti.