1 Ekaṃ samayaṃ bhagavā campāyaṃ viharati gaggarāya pokkharaṇiyā tīre mahatā bhikkhusanghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati vaṇṇena ceva yasasā ca. Atha kho āyasmato vangīsassa etadahosi:  "ayaṃ kho bhagavā campāyaṃ viharati gaggarāya pokkharaṇiyā tīre mahatā bhikkhusanghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati vaṇṇena ceva yasasā ca. Yannūnāhaṃ bhagavantaṃ sammukhā sāruppāya gāthāya abhitthaveyyan"ti.

2 Atha kho āyasmā vangīso uṭṭhāyāsanā ekaṃsaṃ uttarāsangaṃ karitvā yena bhagavā tenañjaliṃ paṇāmetvā bhagavantaṃ etadavoca:  "paṭibhāti maṃ, bhagavā, paṭibhāti maṃ, sugatā"ti. "Paṭibhātu taṃ, vangīsā"ti bhagavā avoca. Atha kho āyasmā vangīso bhagavantaṃ sammukhā sāruppāya gāthāya abhitthavi: 

3 "Cando yathā vigatavalāhake nabhe,
Virocati vigatamalova bhāṇumā;
Evampi angīrasa tvaṃ mahāmuni,
Atirocasi yasasā sabbalokan"ti.