1 Ekaṃ samayaṃ bhagavā rājagahe viharati gijjhakūṭe pabbate. Atha kho bhagavā bhikkhū āmantesi:  "āyāma, bhikkhave, yena paṭibhānakūṭo tenupasankamissāma divāvihārāyā"ti. "Evaṃ, bhante"ti kho te bhikkhū bhagavato paccassosuṃ. Atha kho bhagavā sambahulehi bhikkhūhi saddhiṃ yena paṭibhānakūṭo tenupasankami. Addasā kho aññataro bhikkhu paṭibhānakūṭe mahantaṃ papātaṃ. Disvāna bhagavantaṃ etadavoca:  "mahā vatāyaṃ, bhante, papāto subhayānako, bhante, papāto. Atthi nu kho, bhante, imamhā papātā añño papāto mahantataro ca bhayānakataro cā"ti? "Atthi kho, bhikkhu, imamhā papātā añño papāto mahantataro ca bhayānakataro cā"ti.

2 "Katamo pana, bhante, imamhā papātā añño papāto mahantataro ca bhayānakataro cā"ti? "Ye hi keci, bhikkhave, samaṇā vā brāhmaṇā vā ‘idaṃ dukkhan’ti yathābhūtaṃ nappajānanti, ‘ayaṃ dukkhasamudayo’ti yathābhūtaṃ nappajānanti, ‘ayaṃ dukkhanirodho’ti yathābhūtaṃ nappajānanti, ‘ayaṃ dukkhanirodhagāminī paṭipadā’ti yathābhūtaṃ nappajānanti, te jātisaṃvattanikesu sankhāresu abhiramanti, jarāsaṃvattanikesu sankhāresu abhiramanti, maraṇasaṃvattanikesu sankhāresu abhiramanti, sokaparidevadukkhadomanassupāyāsasaṃvattanikesu sankhāresu abhiramanti. Te jātisaṃvattanikesu sankhāresu abhiratā jarāsaṃvattanikesu sankhāresu abhiratā maraṇasaṃvattanikesu sankhāresu abhiratā sokaparidevadukkhadomanassupāyāsasaṃvattanikesu sankhāresu abhiratā jātisaṃvattanikepi sankhāre abhisankharonti, jarāsaṃvattanikepi sankhāre abhisankharonti, maraṇasaṃvattanikepi sankhāre abhisankharonti, sokaparidevadukkhadomanassupāyāsasaṃvattanikepi sankhāre abhisankharonti. Te jātisaṃvattanikepi sankhāre abhisankharitvā jarāsaṃvattanikepi sankhāre abhisankharitvā maraṇasaṃvattanikepi sankhāre abhisankharitvā sokaparidevadukkhadomanassupāyāsasaṃvattanikepi sankhāre abhisankharitvā jātipapātampi papatanti, jarāpapātampi papatanti, maraṇapapātampi papatanti, sokaparidevadukkhadomanassupāyāsapapātampi papatanti. Te na parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccanti dukkhasmā’ti vadāmi.

3 Ye ca kho keci, bhikkhave, samaṇā vā brāhmaṇā vā ‘idaṃ dukkhan’ti yathābhūtaṃ pajānanti … pe … ‘ayaṃ dukkhanirodhagāminī paṭipadā’ti yathābhūtaṃ pajānanti, te jātisaṃvattanikesu sankhāresu nābhiramanti, jarāsaṃvattanikesu sankhāresu nābhiramanti, maraṇasaṃvattanikesu sankhāresu nābhiramanti, sokaparidevadukkhadomanassupāyāsasaṃvattanikesu sankhāresu nābhiramanti. Te jātisaṃvattanikesu sankhāresu anabhiratā, jarāsaṃvattanikesu sankhāresu anabhiratā, maraṇasaṃvattanikesu sankhāresu anabhiratā, sokaparidevadukkhadomanassupāyāsasaṃvattanikesu sankhāresu anabhiratā, jātisaṃvattanikepi sankhāre nābhisankharonti, jarāsaṃvattanikepi sankhāre nābhisankharonti, maraṇasaṃvattanikepi sankhāre nābhisankharonti, sokaparidevadukkhadomanassupāyāsasaṃvattanikepi sankhāre nābhisankharonti. Te jātisaṃvattanikepi sankhāre anabhisankharitvā, jarāsaṃvattanikepi sankhāre anabhisankharitvā, maraṇasaṃvattanikepi sankhāre anabhisankharitvā, sokaparidevadukkhadomanassupāyāsasaṃvattanikepi sankhāre anabhisankharitvā, jātipapātampi nappapatanti, jarāpapātampi nappapatanti, maraṇapapātampi nappapatanti, sokaparidevadukkhadomanassupāyāsapapātampi nappapatanti. Te parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Parimuccanti dukkhasmā’ti vadāmi.

4 Tasmātiha, bhikkhave, ‘idaṃ dukkhan’ti yogo karaṇīyo … pe … ‘ayaṃ dukkhanirodhagāminī paṭipadā’ti yogo karaṇīyo"ti.

Dutiyaṃ.