1 Sāvatthinidānaṃ. Atha kho aññataro bhikkhu yena bhagavā tenupasankami … pe … ekamantaṃ nisinno kho so bhikkhu bhagavantaṃ etadavoca:  "‘bojjhangā, bojjhangā’ti, bhante, vuccanti. Kittāvatā nu kho, bhante, ‘bojjhangā’ti vuccantī"ti? "Bodhāya saṃvattantīti kho, bhikkhu, tasmā ‘bojjhangā’ti vuccanti. Idha, bhikkhu, satisambojjhangaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ … pe … upekkhāsambojjhangaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Tassime satta bojjhange bhāvayato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati. Vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Bodhāya saṃvattantīti, bhikkhu, tasmā ‘bojjhangā’ti vuccantī"ti.

Pañcamaṃ.