1 Sāvatthinidānaṃ. Atha kho nandiyo paribbājako yena bhagavā tenupasankami; upasankamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho nandiyo paribbājako bhagavantaṃ etadavoca:  "kati nu kho, bho gotama, dhammā bhāvitā bahulīkatā nibbānangamā honti nibbānaparāyanā nibbānapariyosānā"ti?

2 "Aṭṭhime kho, nandiya, dhammā bhāvitā bahulīkatā nibbānangamā honti nibbānaparāyanā nibbānapariyosānā. Katame aṭṭha? Seyyathidaṃ – sammādiṭṭhi … pe … sammāsamādhi. Ime kho, nandiya, aṭṭha dhammā bhāvitā bahulīkatā nibbānangamā honti nibbānaparāyanā nibbānapariyosānā"ti. Evaṃ vutte, nandiyo paribbājako bhagavantaṃ etadavoca:  "abhikkantaṃ, bho gotama, abhikkantaṃ, bho gotama … pe … upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatan"ti.

Dasamaṃ.

Avijjāvaggo paṭhamo.

3 Avijjañca upaḍḍhañca,
sāriputto ca brāhmaṇo;
Kimatthiyo ca dve bhikkhū,
vibhango sūkanandiyāti.