Samyutta Nikāya - Connected Discourses on the Unconditioned 43.12

Saṃyutta Nikāya - The Connected Discourses

Connected Discourses on the Unconditioned: SN43:12 The Unconditioned

A Saddhamma Study Group translation from the Pāḷi text (coming sooner or later).
For more copyright information please see:

1 "Asankhatañca vo, bhikkhave, desessāmi asankhatagāmiñca maggaṃ. Taṃ suṇātha. Katamañca, bhikkhave, asankhataṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, asankhataṃ. Katamo ca, bhikkhave, asankhatagāmimaggo? Samatho. Ayaṃ vuccati, bhikkhave, asankhatagāmimaggo. Iti kho, bhikkhave, desitaṃ vo mayā asankhataṃ, desito asankhatagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanīti. (1.1)

2 Asankhatañca vo, bhikkhave, desessāmi asankhatagāmiñca maggaṃ. Taṃ suṇātha. Katamañca, bhikkhave, asankhataṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, asankhataṃ. Katamo ca, bhikkhave, asankhatagāmimaggo? Vipassanā. Ayaṃ vuccati, bhikkhave, asankhatagāmimaggo. Iti kho, bhikkhave, desitaṃ vo mayā asankhataṃ … pe … ayaṃ vo amhākaṃ anusāsanīti. (1.2)

3 Katamo ca, bhikkhave, asankhatagāmimaggo? Savitakko savicāro samādhi. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Avitakko vicāramatto samādhi. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Avitakko avicāro samādhi. Ayaṃ vuccati, bhikkhave, asankhatagāmimaggo … pe … . (1.3–5.)

4 Katamo ca, bhikkhave, asankhatagāmimaggo? Suññato samādhi. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Animitto samādhi. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Appaṇihito samādhi. Ayaṃ vuccati, bhikkhave, asankhatagāmimaggo … pe … . (1.6–8.)

5 Katamo ca, bhikkhave, asankhatagāmimaggo? Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu vedanāsu vedanānupassī viharati … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu citte cittānupassī viharati … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu dhammesu dhammānupassī viharati … pe … ayaṃ vuccati, bhikkhave, asankhatagāmimaggo … pe … . (1.9–12.)

6 Katamo ca, bhikkhave, asankhatagāmimaggo? Idha, bhikkhave, bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati. Ayaṃ vuccati, bhikkhave, asankhatagāmimaggo … pe … . (1.13–16.)

7 Katamo ca, bhikkhave, asankhatagāmimaggo? Idha, bhikkhave, bhikkhu chandasamādhipadhānasankhārasamannāgataṃ iddhipādaṃ bhāveti. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu vīriyasamādhipadhānasankhārasamannāgataṃ iddhipādaṃ bhāveti. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu cittasamādhipadhānasankhārasamannāgataṃ iddhipādaṃ bhāveti. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu vīmaṃsasamādhipadhānasankhārasamannāgataṃ iddhipādaṃ bhāveti. Ayaṃ vuccati, bhikkhave, asankhatagāmimaggo … pe … . (1.17–20.)

8 Katamo ca, bhikkhave, asankhatagāmimaggo? Idha, bhikkhave, bhikkhu saddhindriyaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu vīriyindriyaṃ bhāveti vivekanissitaṃ … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu satindriyaṃ bhāveti … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu samādhindriyaṃ bhāveti … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu paññindriyaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Ayaṃ vuccati, bhikkhave, asankhatagāmimaggo … pe … . (1.21–25.)

9 Katamo ca, bhikkhave, asankhatagāmimaggo? Idha, bhikkhave, bhikkhu saddhābalaṃ bhāveti vivekanissitaṃ … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu vīriyabalaṃ bhāveti … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu satibalaṃ bhāveti … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu samādhibalaṃ bhāveti … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu paññābalaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Ayaṃ vuccati, bhikkhave, asankhatagāmimaggo … pe … . (1.26–30.)

10 Katamo ca, bhikkhave, asankhatagāmimaggo? Idha, bhikkhave, bhikkhu satisambojjhangaṃ bhāveti vivekanissitaṃ … pe … ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu dhammavicayasambojjhangaṃ bhāveti … pe … vīriyasambojjhangaṃ bhāveti … pe … pītisambojjhangaṃ bhāveti … pe … passaddhisambojjhangaṃ bhāveti … pe … samādhisambojjhangaṃ bhāveti … pe … upekkhāsambojjhangaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Ayaṃ vuccati, bhikkhave, asankhatagāmimaggo … pe … . (1.31–37.)

11 Katamo ca, bhikkhave, asankhatagāmimaggo? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Ayaṃ vuccati, bhikkhave, asankhatagāmimaggo … pe … katamo ca, bhikkhave, asankhatagāmimaggo? Idha, bhikkhave, bhikkhu sammāsankappaṃ bhāveti … pe … sammāvācaṃ bhāveti … pe … sammākammantaṃ bhāveti … pe … sammāājīvaṃ bhāveti … pe … sammāvāyāmaṃ bhāveti … pe … sammāsatiṃ bhāveti … pe … asankhatañca vo, bhikkhave, desessāmi asankhatagāmiñca maggaṃ. Taṃ suṇātha. Katamañca, bhikkhave, asankhataṃ … pe … ? Katamo ca, bhikkhave, asankhatagāmimaggo? Idha, bhikkhave, bhikkhu sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Ayaṃ vuccati, bhikkhave, asankhatagāmimaggo. Iti kho, bhikkhave, desitaṃ vo mayā asankhataṃ, desito asankhatagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī"ti. (1.38–45.)

Paṭhamaṃ.