1 Ekaṃ samayaṃ āyasmā kāmabhū macchikāsaṇḍe viharati ambāṭakavane. Atha kho citto gahapati yenāyasmā kāmabhū tenupasankami; upasankamitvā ekamantaṃ nisīdi. Ekamantaṃ nisinno kho citto gahapati āyasmantaṃ kāmabhuṃ etadavoca:  "kati nu kho, bhante, sankhārā"ti? "Tayo kho, gahapati, sankhārā – kāyasankhāro, vacīsankhāro, cittasankhāro"ti. "Sādhu, bhante"ti kho citto gahapati āyasmato kāmabhussa bhāsitaṃ abhinanditvā anumoditvā āyasmantaṃ kāmabhuṃ uttariṃ pañhaṃ apucchi:  "katamo pana, bhante, kāyasankhāro, katamo vacīsankhāro, katamo cittasankhāro"ti? "Assāsapassāsā kho, gahapati, kāyasankhāro, vitakkavicārā vacīsankhāro, saññā ca vedanā ca cittasankhāro"ti.

2 "Sādhu, bhante"ti kho citto gahapati … pe … uttariṃ pañhaṃ apucchi:  "kasmā pana, bhante, assāsapassāsā kāyasankhāro, kasmā vitakkavicārā vacīsankhāro, kasmā saññā ca vedanā ca cittasankhāro"ti? "Assāsapassāsā kho, gahapati, kāyikā. Ete dhammā kāyappaṭibaddhā, tasmā assāsapassāsā kāyasankhāro. Pubbe kho, gahapati, vitakketvā vicāretvā pacchā vācaṃ bhindati, tasmā vitakkavicārā vacīsankhāro. Saññā ca vedanā ca cetasikā. Ete dhammā cittappaṭibaddhā, tasmā saññā ca vedanā ca cittasankhāro"ti.

3 "Sādhu … pe … uttariṃ pañhaṃ apucchi:  "kathaṃ pana, bhante, saññāvedayitanirodhasamāpatti hotī"ti? "Na kho, gahapati, saññāvedayitanirodhaṃ samāpajjantassa bhikkhuno evaṃ hoti:  ‘ahaṃ saññāvedayitanirodhaṃ samāpajjissan’ti vā ‘ahaṃ saññāvedayitanirodhaṃ samāpajjāmī’ti vā ‘ahaṃ saññāvedayitanirodhaṃ samāpanno’ti vā. Atha khvassa pubbeva tathā cittaṃ bhāvitaṃ hoti yaṃ taṃ tathattāya upanetī"ti.

4 "Sādhu … pe … uttariṃ pañhaṃ apucchi:  "saññāvedayitanirodhaṃ samāpajjantassa pana, bhante, bhikkhuno katame dhammā paṭhamaṃ nirujjhanti, yadi vā kāyasankhāro, yadi vā vacīsankhāro, yadi vā cittasankhāro"ti? "Saññāvedayitanirodhaṃ samāpajjantassa kho, gahapati, bhikkhuno vacīsankhāro paṭhamaṃ nirujjhati, tato kāyasankhāro, tato cittasankhāro"ti.

5 "Sādhu … pe … uttariṃ pañhaṃ apucchi:  "yvāyaṃ, bhante, mato kālankato, yo cāyaṃ bhikkhu saññāvedayitanirodhaṃ samāpanno, imesaṃ kiṃ nānākaraṇan"ti? "Yvāyaṃ, gahapati, mato kālankato tassa kāyasankhāro niruddho paṭippassaddho, vacīsankhāro niruddho paṭippassaddho, cittasankhāro niruddho paṭippassaddho, āyu parikkhīṇo, usmā vūpasantā, indriyāni viparibhinnāni. Yo ca khvāyaṃ, gahapati, bhikkhu saññāvedayitanirodhaṃ samāpanno, tassapi kāyasankhāro niruddho paṭippassaddho, vacīsankhāro niruddho paṭippassaddho, cittasankhāro niruddho paṭippassaddho, āyu aparikkhīṇo, usmā avūpasantā, indriyāni vippasannāni. Yvāyaṃ, gahapati, mato kālankato, yo cāyaṃ bhikkhu saññāvedayitanirodhaṃ samāpanno, idaṃ nesaṃ nānākaraṇan"ti.

6 "Sādhu … pe … uttariṃ pañhaṃ apucchi:  "kathaṃ pana, bhante, saññāvedayitanirodhasamāpattiyā vuṭṭhānaṃ hotī"ti? "Na kho, gahapati, saññāvedayitanirodhasamāpattiyā vuṭṭhahantassa bhikkhuno evaṃ hoti:  ‘ahaṃ saññāvedayitanirodhasamāpattiyā vuṭṭhahissan’ti vā ‘ahaṃ saññāvedayitanirodhasamāpattiyā vuṭṭhahāmī’ti vā ‘ahaṃ saññāvedayitanirodhasamāpattiyā vuṭṭhito’ti vā. Atha khvassa pubbeva tathā cittaṃ bhāvitaṃ hoti, yaṃ taṃ tathattāya upanetī"ti.

7 "Sādhu, bhante … pe … uttariṃ pañhaṃ apucchi:  "saññāvedayitanirodhasamāpattiyā vuṭṭhahantassa pana, bhante, bhikkhuno katame dhammā paṭhamaṃ uppajjanti, yadi vā kāyasankhāro, yadi vā vacīsankhāro, yadi vā cittasankhāro"ti? "Saññāvedayitanirodhasamāpattiyā vuṭṭhahantassa, gahapati, bhikkhuno cittasankhāro paṭhamaṃ uppajjati, tato kāyasankhāro, tato vacīsankhāro"ti.

8 "Sādhu … pe … uttariṃ pañhaṃ apucchi:  "saññāvedayitanirodhasamāpattiyā vuṭṭhitaṃ pana, bhante, bhikkhuṃ kati phassā phusanti"? "Saññāvedayitanirodhasamāpattiyā vuṭṭhitaṃ kho, gahapati, bhikkhuṃ tayo phassā phusanti – suññato phasso, animitto phasso, appaṇihito phasso"ti.

9 "Sādhu … pe … uttariṃ pañhaṃ apucchi:  "saññāvedayitanirodhasamāpattiyā vuṭṭhitassa pana, bhante, bhikkhuno kiṃninnaṃ cittaṃ hoti, kiṃpoṇaṃ, kiṃpabbhāran"ti? "Saññāvedayitanirodhasamāpattiyā vuṭṭhitassa kho, gahapati, bhikkhuno vivekaninnaṃ cittaṃ hoti vivekapoṇaṃ vivekapabbhāran"ti.

10 "Sādhu, bhante"ti kho citto gahapati āyasmato kāmabhussa bhāsitaṃ abhinanditvā anumoditvā āyasmantaṃ kāmabhuṃ uttariṃ pañhaṃ apucchi:  "saññāvedayitanirodhasamāpattiyā pana, bhante, kati dhammā bahūpakārā"ti? "Addhā kho tvaṃ, gahapati, yaṃ paṭhamaṃ pucchitabbaṃ taṃ pucchasi. Api ca tyāhaṃ byākarissāmi. Saññāvedayitanirodhasamāpattiyā kho, gahapati, dve dhammā bahūpakārā – samatho ca vipassanā cā"ti.

Chaṭṭhaṃ.