Saddhamma Study Group

Saṃyutta Nikāya - The Connected Discourses

Connected Discourses on the Six Sense Bases: SN35:138 Not Yours (1)

  • A Saddhamma Study Group translation from the Pāḷi text (coming sooner or later).

    For more copyright information please see:

1 "Yaṃ, bhikkhave, na tumhākaṃ taṃ pajahatha. Taṃ vo pahīnaṃ hitāya sukhāya bhavissati. Kiñca, bhikkhave, na tumhākaṃ? Cakkhu, bhikkhave, na tumhākaṃ; taṃ pajahatha. Taṃ vo pahīnaṃ hitāya sukhāya bhavissati … pe … jivhā na tumhākaṃ; taṃ pajahatha. Sā vo pahīnā hitāya sukhāya bhavissati … pe … mano na tumhākaṃ; taṃ pajahatha. So vo pahīno hitāya sukhāya bhavissati. Seyyathāpi, bhikkhave, yaṃ imasmiṃ jetavane tiṇakaṭṭhasākhāpalāsaṃ taṃ jano hareyya vā ḍaheyya vā yathāpaccayaṃ vā kareyya, api nu tumhākaṃ evamassa:  ‘amhe jano harati vā ḍahati vā yathāpaccayaṃ vā karotī’"ti? "No hetaṃ, bhante". "Taṃ kissa hetu"? "Na hi no etaṃ, bhante, attā vā attaniyaṃ vā"ti. "Evameva kho, bhikkhave, cakkhu na tumhākaṃ; taṃ pajahatha. Taṃ vo pahīnaṃ hitāya sukhāya bhavissati … pe … jivhā na tumhākaṃ; taṃ pajahatha. Sā vo pahīnā hitāya sukhāya bhavissati … pe … mano na tumhākaṃ; taṃ pajahatha. So vo pahīno hitāya sukhāya bhavissatī"ti.

Pañcamaṃ.