1 Sāvatthinidānaṃ. Tena kho pana samayena pañcannaṃ rājūnaṃ pasenadipamukhānaṃ pañcahi kāmaguṇehi samappitānaṃ samangībhūtānaṃ paricārayamānānaṃ ayamantarākathā udapādi:  "kiṃ nu kho kāmānaṃ aggan"ti? Tatrekacce evamāhaṃsu:  "rūpā kāmānaṃ aggan"ti. Ekacce evamāhaṃsu:  "saddā kāmānaṃ aggan"ti. Ekacce evamāhaṃsu:  "gandhā kāmānaṃ aggan"ti. Ekacce evamāhaṃsu:  "rasā kāmānaṃ aggan"ti. Ekacce evamāhaṃsu:  "phoṭṭhabbā kāmānaṃ aggan"ti. Yato kho te rājāno nāsakkhiṃsu aññamaññaṃ saññāpetuṃ.

2 Atha kho rājā pasenadi kosalo te rājāno etadavoca:  "āyāma, mārisā, yena bhagavā tenupasankamissāma; upasankamitvā bhagavantaṃ etamatthaṃ paṭipucchissāma. Yathā no bhagavā byākarissati tathā naṃ dhāressāmā"ti. "Evaṃ, mārisā"ti kho te rājāno rañño pasenadissa kosalassa paccassosuṃ.

3 Atha kho te pañca rājāno pasenadipamukhā yena bhagavā tenupasankamiṃsu; upasankamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho rājā pasenadi kosalo bhagavantaṃ etadavoca:  "idha, bhante, amhākaṃ pañcannaṃ rājūnaṃ pañcahi kāmaguṇehi samappitānaṃ samangībhūtānaṃ paricārayamānānaṃ ayamantarākathā udapādi:  ‘kiṃ nu kho kāmānaṃ aggan’ti? Ekacce evamāhaṃsu:  ‘rūpā kāmānaṃ aggan’ti. Ekacce evamāhaṃsu:  ‘saddā kāmānaṃ aggan’ti. Ekacce evamāhaṃsu:  ‘gandhā kāmānaṃ aggan’ti. Ekacce evamāhaṃsu:  ‘rasā kāmānaṃ aggan’ti. Ekacce evamāhaṃsu:  ‘phoṭṭhabbā kāmānaṃ aggan’ti. Kiṃ nu kho, bhante, kāmānaṃ aggan"ti?

4 "Manāpapariyantaṃ khvāhaṃ, mahārāja, pañcasu kāmaguṇesu agganti vadāmi. Teva, mahārāja, rūpā ekaccassa manāpā honti, teva rūpā ekaccassa amanāpā honti. Yehi ca yo rūpehi attamano hoti paripuṇṇasankappo, so tehi rūpehi aññaṃ rūpaṃ uttaritaraṃ vā paṇītataraṃ vā na pattheti. Te tassa rūpā paramā honti. Te tassa rūpā anuttarā honti.

5 Teva, mahārāja, saddā ekaccassa manāpā honti, teva saddā ekaccassa amanāpā honti. Yehi ca yo saddehi attamano hoti paripuṇṇasankappo, so tehi saddehi aññaṃ saddaṃ uttaritaraṃ vā paṇītataraṃ vā na pattheti. Te tassa saddā paramā honti. Te tassa saddā anuttarā honti.

6 Teva, mahārāja, gandhā ekaccassa manāpā honti, teva gandhā ekaccassa amanāpā honti. Yehi ca yo gandhehi attamano hoti paripuṇṇasankappo, so tehi gandhehi aññaṃ gandhaṃ uttaritaraṃ vā paṇītataraṃ vā na pattheti. Te tassa gandhā paramā honti. Te tassa gandhā anuttarā honti.

7 Teva, mahārāja, rasā ekaccassa manāpā honti, teva rasā ekaccassa amanāpā honti. Yehi ca yo rasehi attamano hoti paripuṇṇasankappo, so tehi rasehi aññaṃ rasaṃ uttaritaraṃ vā paṇītataraṃ vā na pattheti. Te tassa rasā paramā honti. Te tassa rasā anuttarā honti.

8 Teva, mahārāja, phoṭṭhabbā ekaccassa manāpā honti, teva phoṭṭhabbā ekaccassa amanāpā honti. Yehi ca yo phoṭṭhabbehi attamano hoti paripuṇṇasankappo, so tehi phoṭṭhabbehi aññaṃ phoṭṭhabbaṃ uttaritaraṃ vā paṇītataraṃ vā na pattheti. Te tassa phoṭṭhabbā paramā honti. Te tassa phoṭṭhabbā anuttarā hontī"ti.

9 Tena kho pana samayena candanangaliko upāsako tassaṃ parisāyaṃ nisinno hoti. Atha kho candanangaliko upāsako uṭṭhāyāsanā ekaṃsaṃ uttarāsangaṃ karitvā yena bhagavā tenañjaliṃ paṇāmetvā bhagavantaṃ etadavoca:  "paṭibhāti maṃ, bhagavā, paṭibhāti maṃ, sugatā"ti. "Paṭibhātu taṃ, candanangalikā"ti bhagavā avoca.

10 Atha kho candanangaliko upāsako bhagavato sammukhā tadanurūpāya gāthāya abhitthavi: 

11 "Padumaṃ yathā kokanadaṃ sugandhaṃ,
Pāto siyā phullamavītagandhaṃ;
Angīrasaṃ passa virocamānaṃ,
Tapantamādiccamivantalikkhe"ti.

12 Atha kho te pañca rājāno candanangalikaṃ upāsakaṃ pañcahi uttarāsangehi acchādesuṃ. Atha kho candanangaliko upāsako tehi pañcahi uttarāsangehi bhagavantaṃ acchādesīti.