1 Sāvatthinidānaṃ. Atha kho aññataro bhikkhu … pe … ekamantaṃ nisinno kho so bhikkhu bhagavantaṃ etadavoca:  "sādhu me, bhante, bhagavā sankhittena dhammaṃ desetu … pe … ātāpī pahitatto vihareyyan"ti. "Yaṃ kho, bhikkhu, dukkhaṃ; tatra te chando pahātabbo"ti. "Aññātaṃ, bhagavā, aññātaṃ, sugatā"ti.

2 "Yathā kathaṃ pana tvaṃ, bhikkhu, mayā sankhittena bhāsitassa vitthārena atthaṃ ājānāsī"ti? "Rūpaṃ kho, bhante, dukkhaṃ; tatra me chando pahātabbo. Vedanā … saññā … sankhārā … viññāṇaṃ dukkhaṃ; tatra me chando pahātabbo. Imassa khvāhaṃ, bhante, bhagavatā sankhittena bhāsitassa evaṃ vitthārena atthaṃ ājānāmī"ti.

3 "Sādhu sādhu, bhikkhu. Sādhu kho tvaṃ, bhikkhu, mayā sankhittena bhāsitassa vitthārena atthaṃ ājānāsi. Rūpaṃ kho, bhikkhu, dukkhaṃ; tatra te chando pahātabbo. Vedanā … saññā … sankhārā … viññāṇaṃ dukkhaṃ; tatra te chando pahātabbo. Imassa kho, bhikkhu, mayā sankhittena bhāsitassa evaṃ vitthārena attho daṭṭhabbo"ti … pe … aññataro ca pana so bhikkhu arahataṃ ahosīti.

Pañcamaṃ.