1 Sāvatthinidānaṃ. "Tayome, bhikkhave, niruttipathā adhivacanapathā paññattipathā asankiṇṇā asankiṇṇapubbā, na sankīyanti, na sankīyissanti, appaṭikuṭṭhā samaṇehi brāhmaṇehi viññūhi. Katame tayo? Yaṃ, bhikkhave, rūpaṃ atītaṃ niruddhaṃ vipariṇataṃ ‘ahosī’ti tassa sankhā, ‘ahosī’ti tassa samaññā, ‘ahosī’ti tassa paññatti; na tassa sankhā ‘atthī’ti, na tassa sankhā ‘bhavissatī’ti.

2 Yā vedanā atītā niruddhā vipariṇatā ‘ahosī’ti tassā sankhā, ‘ahosī’ti tassā samaññā, ‘ahosī’ti tassā paññatti; na tassā sankhā ‘atthī’ti, na tassā sankhā ‘bhavissatī’ti.

3 Yā saññā … ye sankhārā atītā niruddhā vipariṇatā ‘ahesun’ti tesaṃ sankhā, ‘ahesun’ti tesaṃ samaññā, ‘ahesun’ti tesaṃ paññatti; na tesaṃ sankhā ‘atthī’ti, na tesaṃ sankhā ‘bhavissantī’ti.

4 Yaṃ viññāṇaṃ atītaṃ niruddhaṃ vipariṇataṃ, ‘ahosī’ti tassa sankhā, ‘ahosī’ti tassa samaññā, ‘ahosī’ti tassa paññatti; na tassa sankhā ‘atthī’ti, na tassa sankhā ‘bhavissatī’ti.

5 Yaṃ, bhikkhave, rūpaṃ ajātaṃ apātubhūtaṃ, ‘bhavissatī’ti tassa sankhā, ‘bhavissatī’ti tassa samaññā, ‘bhavissatī’ti tassa paññatti; na tassa sankhā ‘atthī’ti, na tassa sankhā ‘ahosī’ti.

6 Yā vedanā ajātā apātubhūtā, ‘bhavissatī’ti tassā sankhā, ‘bhavissatī’ti tassā samaññā, ‘bhavissatī’ti tassā paññatti; na tassā sankhā ‘atthī’ti, na tassā sankhā ‘ahosī’ti.

7 Yā saññā … ye sankhārā ajātā apātubhūtā, ‘bhavissantī’ti tesaṃ sankhā, ‘bhavissantī’ti tesaṃ samaññā, ‘bhavissantī’ti tesaṃ paññatti; na tesaṃ sankhā ‘atthī’ti, na tesaṃ sankhā ‘ahesun’ti.

8 Yaṃ viññāṇaṃ ajātaṃ apātubhūtaṃ, ‘bhavissatī’ti tassa sankhā, ‘bhavissatī’ti tassa samaññā, ‘bhavissatī’ti tassa paññatti; na tassa sankhā ‘atthī’ti, na tassa sankhā ‘ahosī’ti.

9 Yaṃ, bhikkhave, rūpaṃ jātaṃ pātubhūtaṃ, ‘atthī’ti tassa sankhā, ‘atthī’ti tassa samaññā, ‘atthī’ti tassa paññatti; na tassa sankhā ‘ahosī’ti, na tassa sankhā ‘bhavissatī’ti.

10 Yā vedanā jātā pātubhūtā, ‘atthī’ti tassā sankhā, ‘atthī’ti tassā samaññā, ‘atthī’ti tassā paññatti; na tassā sankhā ‘ahosī’ti, na tassā sankhā ‘bhavissatī’ti.

11 Yā saññā … ye sankhārā jātā pātubhūtā, ‘atthī’ti tesaṃ sankhā, ‘atthī’ti tesaṃ samaññā, ‘atthī’ti tesaṃ paññatti; na tesaṃ sankhā ‘ahesun’ti, na tesaṃ sankhā, ‘bhavissantī’ti.

12 Yaṃ viññāṇaṃ jātaṃ pātubhūtaṃ, ‘atthī’ti tassa sankhā, ‘atthī’ti tassa samaññā, ‘atthī’ti tassa paññatti; na tassa sankhā ‘ahosī’ti, na tassa sankhā ‘bhavissatī’ti.

13 Ime kho, bhikkhave, tayo niruttipathā adhivacanapathā paññattipathā asankiṇṇā asankiṇṇapubbā, na sankīyanti, na sankīyissanti, appaṭikuṭṭhā samaṇehi brāhmaṇehi viññūhi. Yepi te, bhikkhave, ahesuṃ ukkalā vassabhaññā ahetukavādā akiriyavādā natthikavādā, tepime tayo niruttipathe adhivacanapathe paññattipathe na garahitabbaṃ nappaṭikkositabbaṃ amaññiṃsu. Taṃ kissa hetu? Nindāghaṭṭanabyārosaupārambhabhayā"ti.

Majjhimapaṇṇāsakassa upayavaggo paṭhamo.

14 Upayo bījaṃ udānaṃ,
Upādānaparivattaṃ;
Sattaṭṭhānañca sambuddho,
Pañcamahāli ādittā;
Vaggo niruttipathena cāti.