1 Sāvatthinidānaṃ. Atha kho tāyano devaputto purāṇatitthakaro abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena bhagavā tenupasankami; upasankamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho tāyano devaputto bhagavato santike imā gāthāyo abhāsi: 

2 "Chinda sotaṃ parakkamma,
kāme panuda brāhmaṇa;
Nappahāya munī kāme,
nekattamupapajjati.

3 Kayirā ce kayirāthenaṃ,
daḷhamenaṃ parakkame;
Sithilo hi paribbājo,
bhiyyo ākirate rajaṃ.

4 Akataṃ dukkaṭaṃ seyyo,
pacchā tapati dukkaṭaṃ;
Katañca sukataṃ seyyo,
yaṃ katvā nānutappati.

5 Kuso yathā duggahito,
hatthamevānukantati;
Sāmaññaṃ dupparāmaṭṭhaṃ,
nirayāyūpakaḍḍhati.

6 Yaṃ kiñci sithilaṃ kammaṃ,
sankiliṭṭhañca yaṃ vataṃ;
Sankassaraṃ brahmacariyaṃ,
na taṃ hoti mahapphalan"ti.

7 Idamavoca tāyano devaputto; idaṃ vatvā bhagavantaṃ abhivādetvā padakkhiṇaṃ katvā tatthevantaradhāyīti.

8 Atha kho bhagavā tassā rattiyā accayena bhikkhū āmantesi:  "imaṃ, bhikkhave, rattiṃ tāyano nāma devaputto purāṇatitthakaro abhikkantāya rattiyā abhikkantavaṇṇo kevalakappaṃ jetavanaṃ obhāsetvā yenāhaṃ tenupasankami; upasankamitvā maṃ abhivādetvā ekamantaṃ aṭṭhāsi. Ekamantaṃ ṭhito kho, bhikkhave, tāyano devaputto mama santike imā gāthāyo abhāsi: 

9 ‘Chinda sotaṃ parakkamma,
kāme panuda brāhmaṇa;
Nappahāya munī kāme,
nekattamupapajjati.

10 Kayirā ce kayirāthenaṃ,
daḷhamenaṃ parakkame;
Sithilo hi paribbājo,
bhiyyo ākirate rajaṃ.

11 Akataṃ dukkaṭaṃ seyyo,
pacchā tapati dukkaṭaṃ;
Katañca sukataṃ seyyo,
yaṃ katvā nānutappati.

12 Kuso yathā duggahito,
hatthamevānukantati;
Sāmaññaṃ dupparāmaṭṭhaṃ,
nirayāyūpakaḍḍhati.

13 Yaṃ kiñci sithilaṃ kammaṃ,
sankiliṭṭhañca yaṃ vataṃ;
Sankassaraṃ brahmacariyaṃ,
na taṃ hoti mahapphalan’ti.

14 Idamavoca, bhikkhave, tāyano devaputto, idaṃ vatvā maṃ abhivādetvā padakkhiṇaṃ katvā tatthevantaradhāyi. Uggaṇhātha, bhikkhave, tāyanagāthā; pariyāpuṇātha, bhikkhave, tāyanagāthā; dhāretha, bhikkhave, tāyanagāthā. Atthasaṃhitā, bhikkhave, tāyanagāthā ādibrahmacariyikā"ti.