1 Ekaṃ samayaṃ āyasmā ca sāriputto āyasmā ca mahākoṭṭhiko bārāṇasiyaṃ viharanti isipatane migadāye. Atha kho āyasmā mahākoṭṭhiko sāyanhasamayaṃ paṭisallānā vuṭṭhito yenāyasmā sāriputto tenupasankami; upasankamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā mahākoṭṭhiko āyasmantaṃ sāriputtaṃ etadavoca:  "kiṃ nu kho, āvuso sāriputta, sayankataṃ jarāmaraṇaṃ, parankataṃ jarāmaraṇaṃ, sayankatañca parankatañca jarāmaraṇaṃ, udāhu asayankāraṃ aparankāraṃ adhiccasamuppannaṃ jarāmaraṇan"ti? "Na kho, āvuso koṭṭhika, sayankataṃ jarāmaraṇaṃ, na parankataṃ jarāmaraṇaṃ, na sayankatañca parankatañca jarāmaraṇaṃ, nāpi asayankāraṃ aparankāraṃ adhiccasamuppannaṃ jarāmaraṇaṃ. Api ca jātipaccayā jarāmaraṇan"ti.

2 "Kiṃ nu kho, āvuso sāriputta, sayankatā jāti, parankatā jāti, sayankatā ca parankatā ca jāti, udāhu asayankārā aparankārā adhiccasamuppannā jātī"ti? "Na kho, āvuso koṭṭhika, sayankatā jāti, na parankatā jāti, na sayankatā ca parankatā ca jāti, nāpi asayankārā aparankārā adhiccasamuppannā jāti. Api ca bhavapaccayā jātī"ti.

3 "Kiṃ nu kho, āvuso sāriputta, sayankato bhavo … pe … sayankataṃ upādānaṃ … sayankatā taṇhā … sayankatā vedanā … sayankato phasso … sayankataṃ saḷāyatanaṃ … sayankataṃ nāmarūpaṃ, parankataṃ nāmarūpaṃ, sayankatañca parankatañca nāmarūpaṃ, udāhu asayankāraṃ aparankāraṃ adhiccasamuppannaṃ nāmarūpan"ti? "Na kho, āvuso koṭṭhika, sayankataṃ nāmarūpaṃ, na parankataṃ nāmarūpaṃ, na sayankatañca parankatañca nāmarūpaṃ, nāpi asayankāraṃ aparankāraṃ, adhiccasamuppannaṃ nāmarūpaṃ. Api ca viññāṇapaccayā nāmarūpan"ti.

4 "Kiṃ nu kho, āvuso sāriputta, sayankataṃ viññāṇaṃ, parankataṃ viññāṇaṃ, sayankatañca parankatañca viññāṇaṃ, udāhu asayankāraṃ aparankāraṃ adhiccasamuppannaṃ viññāṇan"ti? "Na kho, āvuso koṭṭhika, sayankataṃ viññāṇaṃ, na parankataṃ viññāṇaṃ, na sayankatañca parankatañca viññāṇaṃ, nāpi asayankāraṃ aparankāraṃ adhiccasamuppannaṃ viññāṇaṃ. Api ca nāmarūpapaccayā viññāṇan"ti.

5 "Idāneva kho mayaṃ āyasmato sāriputtassa bhāsitaṃ evaṃ ājānāma:  ‘na khvāvuso koṭṭhika, sayankataṃ nāmarūpaṃ, na parankataṃ nāmarūpaṃ, na sayankatañca parankatañca nāmarūpaṃ, nāpi asayankāraṃ aparankāraṃ adhiccasamuppannaṃ nāmarūpaṃ. Api ca viññāṇapaccayā nāmarūpan’ti.

6 Idāneva ca pana mayaṃ āyasmato sāriputtassa bhāsitaṃ evaṃ ājānāma:  ‘na khvāvuso koṭṭhika, sayankataṃ viññāṇaṃ, na parankataṃ viññāṇaṃ, na sayankatañca parankatañca viññāṇaṃ, nāpi asayankāraṃ aparankāraṃ adhiccasamuppannaṃ viññāṇaṃ. Api ca nāmarūpapaccayā viññāṇan’ti.

7 Yathā kathaṃ panāvuso sāriputta, imassa bhāsitassa attho daṭṭhabbo"ti? "Tenahāvuso, upamaṃ te karissāmi. Upamāyapidhekacce viññū purisā bhāsitassa atthaṃ jānanti. Seyyathāpi, āvuso, dve naḷakalāpiyo aññamaññaṃ nissāya tiṭṭheyyuṃ. Evameva kho, āvuso, nāmarūpapaccayā viññāṇaṃ; viññāṇapaccayā nāmarūpaṃ; nāmarūpapaccayā saḷāyatanaṃ; saḷāyatanapaccayā phasso … pe … evametassa kevalassa dukkhakkhandhassa samudayo hoti. Tāsañce, āvuso, naḷakalāpīnaṃ ekaṃ ākaḍḍheyya, ekā papateyya; aparañce ākaḍḍheyya, aparā papateyya. Evameva kho, āvuso, nāmarūpanirodhā viññāṇanirodho; viññāṇanirodhā nāmarūpanirodho; nāmarūpanirodhā saḷāyatananirodho; saḷāyatananirodhā phassanirodho … pe … evametassa kevalassa dukkhakkhandhassa nirodho hotī"ti.

8 "Acchariyaṃ, āvuso sāriputta; abbhutaṃ, āvuso sāriputta. Yāvasubhāsitañcidaṃ āyasmatā sāriputtena. Idañca pana mayaṃ āyasmato sāriputtassa bhāsitaṃ imehi chattiṃsāya vatthūhi anumodāma: 

9 ‘Jarāmaraṇassa ce, āvuso, bhikkhu nibbidāya virāgāya nirodhāya dhammaṃ deseti, dhammakathiko bhikkhūti alaṃvacanāya. Jarāmaraṇassa ce, āvuso, bhikkhu nibbidāya virāgāya nirodhāya paṭipanno hoti, dhammānudhammappaṭipanno bhikkhūti alaṃvacanāya. Jarāmaraṇassa ce, āvuso, bhikkhu nibbidā virāgā nirodhā anupādā vimutto hoti, diṭṭhadhammanibbānappatto bhikkhūti alaṃvacanāya. Jātiyā ce … bhavassa ce … upādānassa ce … taṇhāya ce … vedanāya ce … phassassa ce … saḷāyatanassa ce … nāmarūpassa ce … viññāṇassa ce … sankhārānañce … avijjāya ce, āvuso, bhikkhu nibbidāya virāgāya nirodhāya dhammaṃ deseti, dhammakathiko bhikkhūti alaṃvacanāya. Avijjāya ce, āvuso, bhikkhu nibbidāya virāgāya nirodhāya paṭipanno hoti, dhammānudhammappaṭipanno bhikkhūti alaṃvacanāya. Avijjāya ce, āvuso, bhikkhu nibbidā virāgā nirodhā anupādā vimutto hoti, diṭṭhadhammanibbānappatto bhikkhūti alaṃvacanāyā’"ti.

Sattamaṃ.