1 Sāvatthiyaṃ viharati. "Tatra kho … pe … ye hi keci, bhikkhave, samaṇā vā brāhmaṇā vā jarāmaraṇaṃ nappajānanti, jarāmaraṇasamudayaṃ nappajānanti, jarāmaraṇanirodhaṃ nappajānanti, jarāmaraṇanirodhagāminiṃ paṭipadaṃ nappajānanti te vata jarāmaraṇaṃ samatikkamma ṭhassantīti netaṃ ṭhānaṃ vijjati. Jātiṃ nappajānanti … pe … bhavaṃ … upādānaṃ … taṇhaṃ … vedanaṃ … phassaṃ … saḷāyatanaṃ … nāmarūpaṃ … viññāṇaṃ … sankhāre nappajānanti, sankhārasamudayaṃ nappajānanti, sankhāranirodhaṃ nappajānanti, sankhāranirodhagāminiṃ paṭipadaṃ nappajānanti te vata sankhāre samatikkamma ṭhassantīti netaṃ ṭhānaṃ vijjati.

2 Ye ca kho keci, bhikkhave, samaṇā vā brāhmaṇā vā jarāmaraṇaṃ pajānanti, jarāmaraṇasamudayaṃ pajānanti, jarāmaraṇanirodhaṃ pajānanti, jarāmaraṇanirodhagāminiṃ paṭipadaṃ pajānanti te vata jarāmaraṇaṃ samatikkamma ṭhassantīti ṭhānametaṃ vijjati. Jātiṃ pajānanti … pe … bhavaṃ … upādānaṃ … taṇhaṃ … vedanaṃ … phassaṃ … saḷāyatanaṃ … nāmarūpaṃ … viññāṇaṃ … sankhāre pajānanti, sankhārasamudayaṃ pajānanti, sankhāranirodhaṃ pajānanti, sankhāranirodhagāminiṃ paṭipadaṃ pajānanti. Te vata sankhāre samatikkamma ṭhassantīti ṭhānametaṃ vijjatī"ti.

Dasamaṃ.

Dasabalavaggo tatiyo.

3 Dve dasabalā upanisā ca,
Aññatitthiyabhūmijo;
Upavāṇo paccayo bhikkhu,
Dve ca samaṇabrāhmaṇāti.